Shugaban ƙasar Venezuela, Nicolás Maduro, ya zargi gwamnatin Amurka da ƙulla makirci don ƙirƙirar yaƙi a kansa, yana mai cewa Amurka na amfani da ƙarya da yaɗa jita-jita domin ɓata masa suna da tayar da hankalin jama’a kafin zaɓen ƙasar da ke tafe.
Da yake jawabi a gidan talabijin daga birnin Caracas, Maduro ya bayyana cewa gwamnatin Amurka da abokan hulɗarta “na ƙoƙarin yaɗa labaran ƙarya da canza ra’ayoyin ƙasashen duniya” domin su sami hujjar tsoma baki a cikin harkokin cikin gida na Venezuela. “Suna son su haifar da dalilin da zai basu dama su kai wa ƙasarmu hari,” in ji Maduro. “Amma mu a shirye muke mu kare ‘yancin kai da zaman lafiyar Venezuela.”
Shugaban ya dade yana zargin Amurka da tallafawa ‘yan adawa da kuma ƙoƙarin kifar da gwamnatinsa ta hanyar matsin tattalin arziki da farfaganda. Sai dai gwamnatin Amurka ta ce takunkuman da take sanyawa da matakan diflomasiyya da take ɗauka suna nufin kare haƙƙin ɗan Adam da tabbatar da dimokuraɗiyya a ƙasar.
Dangantaka tsakanin ƙasashen biyu ta sake yin tsami a ‘yan makonnin da suka gabata bayan Amurka ta zargi Caracas da aikata maguɗin zaɓe da kuma hana ‘yan adawa damar tsayawa takara.
Duk da matsin lambar da yake fuskanta, Maduro ya ce gwamnatinsa ba za ta lamunci barazanar kasashen waje ba, yana mai cewa, “ba za mu taɓa durƙusawa ga mulkin mallaka ba.”