Rahotanni sun nuna cewa Russia na shirin sanya wasu ma’aikatan farar hula, ciki har da ma’aikatan banki, cikin ayyukan taimakawa harbo jiragen ƙwaro (drones) da Ukraine ke amfani da su wajen kai hare-hare.
A cewar rahotanni, hukumomin Rasha na duba yiwuwar horar da wasu ma’aikata da aka zaɓa domin su iya gane jiragen ƙwaro da kuma taimakawa wajen dakile su yayin da Ukraine ke ƙara kai hare-haren nesa cikin yankunan Rasha.
Jami’ai sun ce wannan mataki na daga cikin ƙoƙarin ƙara ƙarfafa tsaron cikin gida da kare muhimman gine-gine, kamfanoni, da cibiyoyin gwamnati daga hare-haren jiragen ƙwaro da suka ƙaru sakamakon yaƙin da ke tsakanin ƙasashen biyu.
Wannan shiri ya haifar da muhawara a cikin Rasha, inda wasu ke ganin bai dace a jawo fararen hula cikin ayyukan soja ba, yayin da wasu ke cewa yawan hare-haren da ake fuskanta na bukatar haɗin gwiwar al’umma gaba ɗaya wajen tsaro.
A ‘yan watannin nan, Ukraine ta ƙara yawan hare-haren jiragen ƙwaro kan biranen Rasha, cibiyoyin mai, sansanonin soja, da muhimman wuraren tattalin arziki da ke nesa da fagen fama.
Masu sharhi sun ce wannan lamari na nuna yadda yaƙin ke ƙara shafar rayuwar fararen hula da cibiyoyi a ɓangarorin biyu, tare da tilasta gwamnatoci daidaita kansu da sabbin hanyoyin yaƙin zamani na amfani da drones da fasahar nesa.