Jam'iyyar mai siyasa ta APC ta kaddamar da kwamitin yaƙin neman zaɓe mai mambobi 1,235 a Lagos
Jam’iyyar APC reshen jihar Lagos ta ƙaddamar da kwamitin yaƙin neman zaɓenta mai mambobi 1,235 domin tunkarar babban zaɓen shekarar 2027.
Jam’iyyar ta kuma umarci dukkan ‘yan takararta da ke neman muƙamai a ƙarƙashin tutarta da su kasance a Najeriya har zuwa lokacin kammala babban zaɓen.
Hukumar ta bayar da umarnin ne a ranar Juma’a yayin ƙaddamar da kwamitin a sakatariyar jam'iyyar APC ta jihar da ke Ikeja.
Ɗan takarar gwamnan jihar Legas na APC, Dakta Kadiri Obafemi Hamzat, ya buƙaci mambobin jam’iyyar da su fito fili su bayyana wa al’umma nasarorin gwamnatin Shugaba Bola Ahmed Tinubu da gwamnatin APC a Lagos.
Hamzat ya ce bai kamata ‘yan jam’iyyar su ji tsoron fitowa yaƙin neman zaɓe ba, yana mai cewa ya kamata su yi alfahari da ‘yan takarar jam’iyyar tare da kare manufofi da nasarorin jam'iyyar da gwamnatin bakiɗaya.
Ya ƙara da cewa, APC a Lagos na da burin samun aƙalla ƙuri’u miliyan 3.5 daga cikin masu kaɗa ƙuri’a a jihar, wadda ta ce tana da rajistar masu zaɓe kusan miliyan 7.5.
A nasa jawabin, shugaban APC na jihar Lagos, Hon. Cornelius Ojelabi, ya ce kwamitin yaƙin neman zaɓen ya ƙunshi sassa 20, waɗanda suka haɗa da tsofaffin gwamnonin jihar da tsofaffin mataimakan gwamnoni da tsofaffin shugabannin ƙananan hukumomi da zaɓaɓɓun ‘yan jam’iyyar.
Haka nan, Ojelabi ya buƙaci mambobin kwamitin da su kasance masu bin doka da oda, da kuma mutunta tsarin shugabanci domin tabbatar da ingantaccen tsarin yaƙin neman zaɓen.
Shugaban jam’iyyar ya kuma umarci ‘yan takarar APC da su kasance cikin shirin halartar yaƙin neman zaɓe, inda ya ce babu wani ɗan takarar da aka amince masa ya fita daga Najeriya har sai bayan kammala babban zaɓen ƙasar 2027.
Ya kuma buƙaci mambobin jam’iyyar da su gudanar da yaƙin neman zaɓen cikin lumana, tare da mayar da hankali kan manufofi maimakon cin mutunci da tashin hankali ko rikici.
Daraktan Janar na kwamitin yaƙin neman zaɓen APC a Lagos, Sanata Musiliu Obanikoro, ya buƙaci mambobin kwamitin da su ajiye duk wata taƙaddama ko rashin jituwa ta baya, su haɗa kai domin ganin jam’iyyar ta samu nasara a zaɓen 2027.
Ogunleye ya ce ƙwarewa da halayen Hamzat za su taimaka wajen ci gaba da ayyukan ci gaban jihar, tare da kira ga mambobin kwamitin da su mayar da hankali wajen gudanar da yakin neman zaɓen cikin nasara.