Babban Sufeto Janar na ‘yansanda, IGP Kayode Egbetokun, ya janye jimillar ‘yansanda 11,566 da aka tura wajen kula da wasu manyan mutane a fadin ƙasar.
Wannan mataki ya biyo bayan umarnin Shugaba Bola Tinubu dangane da ƙaruwar rashin tsaro a ƙasar.
IGP Egbetokun ya tabbatar da hakan a ranar Alhamis yayin da yake ganawa da manyan jami’an ‘yansanda a Abuja.
Ya bayyana cewa, za a tura waɗannan ‘yansanda da aka janye zuwa jihohi daban-daban na ƙasar domin ƙarfafa tsaro.
Haka kuma, ya nuna cewa janyewar jami’an ‘yansanda daga manya mutane za a yi shi a matakai.
A ƙarƙashin sabon tsari, manyan mutane da ke son samun ‘yansanda masu makamai dole ne yanzu su nemi izini daga Hukumar Tsaro da Kula da Al’umma (NSCDC).
Hakanan, wannan umarni ya kasance wani ɓangare na shawarwarin da aka cimma yayin taron tsaro na shugaban ƙasa da manyan hafsoshin soji a Abuja ranar Lahadi.
Fadar shugaban ƙasa ta bayyana cewa, wannan mataki an dauke shi ne domin mayar da ‘yansanda ga ainihin ayyukansu da kuma ƙara karfin su a cikin al’ummomin da ke fama da rashin tsaro.