Wasu da ake zargin ’yan fashin teku ne sun kai hari kan wani jirgin kasuwanci a gaɓar tekun Somaliya, lamarin da ya haifar da sabuwar fargaba kan dawowar matsalar fashin teku bayan shekaru da dama na shiru a yankin.
Rahotannin tsaro na ruwa sun bayyana cewa an kai harin ne a yankin Gulf of Aden, wanda ke daya daga cikin hanyoyin sufuri mafi muhimmanci a duniya. Rahoton ya ce masu harin sun zo ne da ƙananan jiragen ruwa (speedboats) suna ƙoƙarin hawa kan jirgin kafin ma’aikatan jirgin su aika da saƙon neman taimako wanda ya jawo isowar sojojin ruwa cikin gaggawa.
Hukumomi sun tabbatar da cewa duk ma’aikatan jirgin sun tsira, kuma masu harin sun tsere bayan isowar jami’an tsaro. Ba a samu rahoton asarar rai ko rauni ba.
Masana harkokin tsaro sun gargadi cewa wannan lamari na iya zama alamar sake ƙaruwa da fashin teku, musamman ganin yadda rikice-rikicen siyasa a Somaliya da rage sa ido daga rundunar tsaron ruwa ta ƙasashen duniya ke taimakawa wajen ba ’yan fashin damar kai irin waɗannan hare-hare.
An shawarci dukkan jiragen ruwa masu wucewa ta yankin da su ƙara lura da tsaro tare da bin ka’idojin kariya domin kauce wa irin wannan hari.