LG ta Kera Sabbin Na’urorin Gida Masu Amfani da AI a InnoFest 2026 da Mega HORECA 2026

Kamfanin LG Electronics ya ƙaddamar da sabbin hanyoyin magance buƙatun gida da kasuwanci masu amfani da fasahar basirar wucin-gadi (AI) a yayin tarukan InnoFest 2026 da aka gudanar a Abu Dhabi da kuma Mega HORECA 2026 a Nigeria.

A cikin wata sanarwa da kamfanin ya fitar, ya bayyana cewa waɗannan baje-kolin guda biyu sun nuna ƙudirin sa na daidaita sabbin ci gaban fasaha na duniya da ainihin bukatun masu amfani da kayayyaki da kuma ‘yan kasuwa a yankin. Kamfanin ya jaddada cewa gabatar da irin waɗannan sabbin kayayyaki iri ɗaya a kasuwanni daban-daban wata dabara ce da ke nuna manufarsa ta haɗa kowa da kowa, mayar da hankali kan yanayin yankuna, da kuma tabbatar da cewa ana amfani da fasahar AI a aikace domin sauƙaƙa rayuwa.

A taron InnoFest 2026 da aka yi a Abu Dhabi, LG ta bayyana hangen nesanta ga yankin Gabas ta Tsakiya da Afirka (MEA), inda ta gabatar da cikakken jerin na’urorin gida da na rayuwa na zamani masu amfani da AI. Baje-kolin ya nuna yadda tsarin na’urori masu haɗin kai (smart ecosystem) ke aiki, inda kayan gida, na’urorin sanyaya iska da sauran fasahohi ke hulɗa cikin tsari guda domin samar da sauƙin amfani, ƙwarewar mai amfani ta musamman, da kuma ingantaccen amfani da makamashi.