Wasu manyan jiragen dakon ɗanyen mai na ƙasar China sun fice daga mashigar ruwa ta Strait of Hormuz, lamarin da ya ƙara ba kasuwannin duniya fata cewa rikicin da ke tsakanin Amurka da Iran na iya lafa bayan sabbin kalaman da shugaba Donald Trump da mataimakinsa JD Vance suka yi kan yiwuwar cimma yarjejeniyar zaman lafiya da Tehran.
Rahotanni sun nuna cewa tankokin mai guda biyu na China, ɗauke da kusan ganga miliyan huɗu na ɗanyen mai daga Iraq, sun tsallaka mashigar Hormuz lafiya, duk da ci gaba da tashin hankali a yankin.
Trump ya bayyana cewa ya yi kusa da bayar da umarnin sake kai hari kan Iran amma ya dakata bayan sabuwar shawarar zaman lafiya daga Tehran. Shi kuma JD Vance ya ce tattaunawar na tafiya cikin “kyakkyawan yanayi,” duk da cewa har yanzu akwai matsaloli wajen fahimtar cikakken matsayar gwamnatin Iran.
Mashigar Hormuz na ɗaya daga cikin muhimman hanyoyin safarar mai a duniya, inda kusan kaso 20 cikin 100 na man fetur na duniya ke bi ta cikinta. Rikicin da aka shafe watanni ana yi tsakanin Amurka, Isra’ila da Iran ya haddasa tangarɗa ga safarar mai da tashin farashin makamashi a duniya.
Bayan fitowar jiragen da kuma alamun ci gaba a tattaunawar diflomasiyya, farashin mai ya ɗan sauka a kasuwannin duniya, yayin da masu saka hannun jari ke sa ido kan ko Amurka da Iran za su iya cimma matsaya ta ƙarshe domin kawo ƙarshen rikicin.