Miliyoyin masu kaɗa ƙuri’a a Ethiopia sun fara jefa ƙuri’unsu a zaɓen majalisar dokoki da na yankuna, yayin da ake sa ran jam’iyyar Prosperity Party mai mulki ƙarƙashin jagorancin Firaminista Abiy Ahmed za ta sake samun gagarumar nasara.
Rahotanni sun nuna cewa sama da mutane miliyan 50 ne suka yi rajistar zaɓe, yayin da ake gudanar da zaɓen ƙarƙashin tsauraran matakan tsaro saboda matsalolin rashin zaman lafiya a wasu sassan ƙasar.
Sai dai ba a gudanar da zaɓe ba a yankin Tigray da wasu sassan jihar Amhara saboda matsalolin tsaro da rikice-rikicen siyasa da suka biyo bayan yaƙe-yaƙen cikin gida da aka yi a shekarun baya.
Jam’iyyar Prosperity Party ana sa ran za ta yi rinjaye ne saboda raunin jam’iyyun adawa, waɗanda ke fama da rarrabuwar kai da kuma zargin matsin lamba daga gwamnati.
Abiy Ahmed ya hau mulki a shekarar 2018 bayan zanga-zangar adawa da gwamnati, sannan ya lashe kyautar Nobel ta zaman lafiya a shekarar 2019 saboda rawar da ya taka wajen rage rikici da maƙwabciyar ƙasar Eritrea.
Gwamnatinsa ta ce ta samu ci gaba a fannonin tattalin arziki, samar da abinci, da gina kayayyakin more rayuwa, tare da hasashen ƙarin bunƙasar tattalin arziki a shekarar 2026.
Sai dai masu sukar gwamnati suna zargin ta da tauye ‘yancin ‘yan adawa, takaita ‘yancin kafafen yaɗa labarai, da kuma hannu a take haƙƙin ɗan adam a yankunan da rikici ya shafa. Gwamnatin kuwa ta musanta zarge-zargen, tana mai cewa matakan tsaro na da muhimmanci domin kare zaman lafiyar ƙasa.
Muhimman batutuwan da suka mamaye zaɓen sun haɗa da zaman lafiya, tsaro, bunƙasa tattalin arziki, da makomar tsarin siyasar tarayya ta Ethiopia a daidai lokacin da ƙasar ke ci gaba da fama da rikice-rikicen ƙabilanci da hare-haren ‘yan tawaye a yankuna kamar Oromia da Amhara.
Masu sa ido daga Tarayyar Afirka na bibiyar yadda zaɓen ke gudana, yayin da ake sa ran za a sanar da sakamakon hukuma nan gaba a wannan watan.