Hard Rock Cafe Lagos ta sanar da cewa za ta daina gudanar da ayyukanta ƙarƙashin tsarin lasisin kamfanin Hard Rock na duniya bayan cika shekaru goma da fara aiki. Hukumar gudanarwar cibiyar ta bayyana cewa za ta koma tsarin gudanarwa mai cin gashin kansa domin ya dace da yanayin tattalin arziki da damar kasuwancin Najeriya.
Sanarwar ta ce za a kammala cire alamar Hard Rock daga cibiyar kafin ƙarshen watan Yunin 2026.
A cewar gudanarwar, an ɗauki wannan mataki ne bayan gudanar da cikakken nazarin kasuwanci, wanda ya nuna cewa sauye-sauyen tattalin arziki sun yi tasiri sosai kan ci gaban kasuwancin. Ta bayyana cewa tsadar kuɗin lasisin kamfani, faɗuwar darajar Naira, da ƙarin kuɗaɗen bin ƙa'idoji sun rage damar ci gaba da gudanar da kasuwancin cikin riba a dogon lokaci.
Har ila yau, sanarwar ta ce akwai wasu dalilai da suka sa aka ga wajibi ne cibiyar ta samu ƙarin 'yanci wajen yanke shawara, saurin daidaitawa da canje-canjen kasuwa, da kuma tsara makomar kasuwancinta bisa buƙatun cikin gida.
Ta ce sabon tsarin zai ba cibiyar damar samun sauƙin gudanar da harkokin kuɗi, tare da saurin sauya farashi, nau'ikan abinci da dabarun nishaɗi domin su dace da abubuwan da masu amfani da hidimarta ke buƙata a Najeriya.
A lokacin wannan sauyi, cibiyar za ta ci gaba da aiki ƙarƙashin wani dandali na wucin gadi mai suna Curate – Food • Music • Culture. Wannan sabon tsari zai ci gaba da raya cibiyar ta hanyar shirya gidajen cin abinci na wucin gadi, haɗin gwiwa da fitattun masu girki, kide-kide kai tsaye, bukukuwa masu zaman kansu da kuma shirye-shiryen tallata kayayyaki da kamfanoni.
Gudanarwar ta ce Curate zai kasance cibiyar kirkire-kirkire yayin da ake haɓaka sabon babban tsarin baƙunci na dindindin, wanda ake sa ran ƙaddamar da shi cikin shekara mai zuwa.
A cikin sanarwar, gudanarwar ta ce:
"Muna matuƙar alfahari da tafiyar shekaru goma da muka yi da kuma kyawawan abubuwan tunawa da muka ƙirƙira a Lagos. Wannan sauyi zai ba mu damar samar da sabbin ƙwarewar baƙunci da aka tsara musamman domin kasuwannin Najeriya da Afirka. Muna miƙa godiyarmu ga kwastomominmu masu aminci, ma'aikatanmu da abokan hulɗarmu, kuma muna fatan ci gaba da wannan tafiya tare da ku."