Rundunar ’Yan Sandan Jihar Oyo ta ceto wasu ma’aurata da wasu da ake zargin masu garkuwa da mutane ne suka sace a ƙauyen Tiro da ke garin Irawo, a yankin Oke-Ogun na jihar.
Jami’in Hulɗa da Jama’a na rundunar, DSP Ayanlade Olayinka, ne ya bayyana hakan cikin wata sanarwa da ya fitar ranar Alhamis.
A cewar sanarwar, ma’auratan da aka ceto sun haɗa da Alhaji Busiru Booni da matarsa, Alhaja Pitiku. An yi garkuwa da su ne a daren Asabar, 5 ga Yulin 2026, bayan wasu mutane kimanin biyar ɗauke da makamai sun kutsa cikin ƙauyen Tiro, suka riƙa harbe-harbe a iska domin razanar da mutane, kafin su tafi da ma’auratan zuwa wani wuri da ba a sani ba.
Olayinka ya ce nan take Kwamishinan ’Yan Sandan Jihar Oyo, Abimbola Olugbenga, ya ba da umarnin gudanar da wani gagarumin samame na ceto, wanda ya haɗa jami’an ’yan sanda, Hukumar Tsaron Cikin Gida ta Jihar Oyo (Amotekun), masu sintiri na sa-kai da mafarauta.
Ya ce yayin gudanar da aikin, jami’an tsaron sun gano wata babur kirar Bajaj da aka ruwaito cewa an sace, wadda aka yi watsi da ita a cikin wani daji da ke kusa da wurin. Wannan binciken ya zama muhimmin ci gaba wajen gano inda masu garkuwar suke.
Sanarwar ta ƙara da cewa amfani da wannan babur tare da fasahohin zamani ya taimaka wa jami’an tsaron haɗin gwiwa wajen gano maboyar waɗanda ake zargin.
Sai dai, da zarar masu garkuwar suka hango jami’an tsaron suna matsowa kusa, sun buɗe musu wuta, lamarin da ya janyo musayar wuta tsakanin ɓangarorin biyu.