Ma’aikatar Tsaron Amurka (Pentagon) ta buƙaci a gaggauta ƙara samar da makamai a ƙasar, yayin da ake nuna damuwa kan raguwar yawan makaman da Amurka ke da su a ma’ajiyarta.
Jami’an tsaron Amurka na son kamfanonin kera makamai su ƙara saurin samar da makamai da kayan aikin soja domin sake cike ma’ajiyoyin ƙasar. Wannan na zuwa ne yayin da Amurka ke ƙara amfani da makamai daga ma’ajiyarta wajen tallafa wa ƙawayenta da kuma tunkarar barazanar tsaro a sassa daban-daban na duniya.
Pentagon na ganin cewa jinkirin samar da makamai na iya zama barazana ga shirye-shiryen tsaron ƙasar, musamman idan aka samu ƙarin rikice-rikicen soja da suka buƙaci Amurka ta yi amfani da manyan makamai da kayan aikin soja.
Saboda haka, hukumomin tsaron Amurka na matsa wa masana'antun makamai lamba su ƙara ƙarfin samar da kayayyakin soja, tare da rage lokacin da ake ɗauka wajen kera da isar da su ga sojojin Amurka.