Bututun mai na Gabas zuwa Yamma (East-West Pipeline) na ƙasar Saudi Arabia na da matuƙar muhimmanci ga kasuwar man fetur ta duniya saboda yana bai wa Saudiyya wata hanyar jigilar ɗanyen mai zuwa gaɓar Tekun Bahar Maliya, ba tare da dogaro da Mashigar Hormuz kawai ba.
Yawancin man fetur daga yankin Tekun Fasha kan bi ta Mashigar Hormuz kafin ya isa kasuwannin duniya. Amma idan rikici ko wani hatsari ya kawo cikas a mashigar, bututun Gabas zuwa Yamma zai iya taimaka wa Saudiyya wajen ci gaba da jigilar wani kaso na man fetur zuwa tashoshin da ke gabar Tekun Bahar Maliya.
Wannan na da muhimmanci musamman a lokutan da ake fuskantar tashin hankali a Gabas ta Tsakiya, domin duk wata matsala da ta rufe ko ta kawo cikas ga Mashigar Hormuz na iya rage wadatar man fetur tare da haddasa hauhawar farashinsa a kasuwannin duniya.
Bututun ya kuma ba Saudiyya damar kai man fetur zuwa tashar jiragen ruwa ta Yanbu, daga inda jiragen dakon mai za su iya shiga Tekun Bahar Maliya domin kai mai zuwa kasuwannin Turai da sauran sassan duniya.
Saboda haka, bututun Gabas zuwa Yamma ba kawai muhimmin bangare ne na tsarin makamashin Saudiyya ba, har ma yana taimakawa wajen kare wadatar man fetur a kasuwannin duniya. A lokacin rikici ko barazana ga hanyoyin ruwa, yana samar da wata madadin hanya da za ta rage tasirin katsewar jigilar mai.