Ana sa ran a yau jakadun shugaba Donald Trump, da suka hada da surukinsa Jared Kushner da kuma Steve Witkoff, za su isa birnin Moscow a wani sabon yunƙuri na kawo ƙarshen yaƙin da ake tsakanin Rasha da Ukraine.
Shugaban Ukraine, Volodymyr Zelensky, ya ce daga nan wakilan na Amurka za su ziyarci birnin Kyiv a gobe Lahadi, duk da cewa har yanzu Washington ba ta tabbatar da hakan ba. Mista Zelensky ya kuma gabatar da shawarwari na tsagaita wuta na ɗan lokaci a ƙarshen mako.
A gefe guda kuma, jami'an Ukraine sun ce Rasha ta kai hari kan wata cibiyar masana’antu a yankin Dnipropetrovsk cikin dare, inda mutum huɗu suka mutu sannan wasu biyar suka jikkata.