Bayan shekaru 15 na rikicin siyasa da yaƙin basasa, wani sabon tsarin tattaunawa da aka fi sani da “4+4” na neman haɗa manyan ɓangarorin siyasar Libya da ke gaba da juna, tare da buɗe hanyar gudanar da zaɓen shugaban ƙasa da na majalisa cikin watanni 24.
An cimma yarjejeniyar ne ƙarƙashin jagorancin Ofishin Tallafin Majalisar Ɗinkin Duniya a Libya (UNSMIL). Kwamitin 4+4 ya ƙunshi wakilai daga manyan cibiyoyi huɗu na ƙasar, inda aka ware wakilai huɗu daga kowanne ɓangare.
Mene ne yarjejeniyar ta ƙunsa?
Babban burinta shi ne samar da hukuma guda ɗaya da za ta jagoranci ƙasar, da kuma shirya zaɓen ƙasa cikin wa'adin da bai wuce shekaru biyu ba. Haka kuma, yarjejeniyar na neman gyara dokokin zaɓe da sake fasalin hukumar zaɓen ƙasar.
Ɗaya daga cikin muhimman sauye-sauyen da aka amince da su shi ne bai wa masu riƙe da takardun zama ɗan ƙasa biyu damar tsayawa takarar shugaban ƙasa, matuƙar wanda ya yi nasara ya ajiye ɗayan ƙasar kafin rantsar da shi. Haka kuma, an buɗe damar da jami'an soja za su iya tsayawa takara bayan sun bar mukamansu.
Shin za ta kawo haɗin kan Libya?
Wannan shi ne babban abin tambaya. Yarjejeniyar na iya zama muhimmiyar hanya zuwa haɗa ƙasar, amma sa hannu kan yarjejeniya ba ya nufin an riga an kawo ƙarshen rabuwar Libya ba. Wasu manyan 'yan siyasa sun nuna rashin amincewa da yadda aka gudanar da tattaunawar, yayin da wasu ke shakkar ko shugabannin da ke da iko da albarkatun ƙasar za su amince su bar mulki idan aka gudanar da zaɓe.
Don haka, ma'anar “4+4 make 1” ita ce: ƙoƙarin haɗa bangarorin Libya guda biyu da suka daɗe suna fafatawa, domin su samar da gwamnati guda ɗaya da kuma kai ƙasar zuwa zaɓen ƙasa. Amma nasarar shirin za ta dogara ne kan yadda za a aiwatar da yarjejeniyar a zahiri.