Hukumar Lafiya ta Duniya (WHO) ta ce wannan babban ci gaba ne wajen kawar da cutar daga ƙasar.
Hukumar Lafiya ta Duniya (WHO) ta tabbatar da cewa an sallami marar lafiya na ƙarshe da ke fama da cutar Ebola a Jamhuriyar Dimokuraɗiyyar Kongo. Wannan na nuna cewa ana fatan kawo ƙarshen ɓullar cutar a ƙasar bayan dogon lokaci ana fama da ita.
Rahotanni sun nuna cewa an sallami marar lafiyar ne daga cibiyar kula da masu cutar Ebola bayan tabbatar da cewa ba shi da sauran alamun cutar. WHO ta ce tuni ake ci gaba da sa ido na tsawon makonni kafin a ayyana cewa an kawar da cutar gaba ɗaya a yankin.
Hukumar ta WHO ta yaba da ƙoƙarin jami’an lafiya da hukumomin ƙasar wajen daƙile yaduwar cutar, tana mai cewa wannan nasarar tana nuna muhimmancin haɗin kai da gaggawar daukar mataki a lokacin annoba.