Aƙalla mutane uku sun mutu, wasu kuma sun jikkata, sakamakon wani hari da Rasha ta kai a birnin Kharkiv na ƙasar Ukraine, a cewar jami’an yankin. Jami’an ceto sun garzaya wurin domin kashe wuta da kuma nemo waɗanda suka maƙale a ƙarƙashin gine-ginen da suka rushe.
Harin ya kara tayar da hankalin jama’a, musamman duba da yadda hare-haren Rasha ke ƙaruwa kan yankunan fararen hula yayin da lokacin sanyi ke matsowa, wanda hakan ke barazana ga hanyoyin samar da makamashi.
A dai halin da ake ciki, Shugaban Ukraine Volodymyr Zelenskyy na kan hanyarsa ta zuwa Paris, inda zai gana da Shugaban Faransa Emmanuel Macron. Ana sa ran tattaunawar za ta mayar da hankali kan bukatun sojan Ukraine, ƙarin tallafin makamai, da rawar da Turai za ta taka wajen mayar da martani ga hare-haren Rasha masu ƙaruwa.
Ana kallon wannan ganawar a matsayin mai matuƙar muhimmanci, ganin yadda Ukraine ke neman ƙarin goyon bayan ƙasashen duniya a wani mataki mai wahala na wannan yaƙi.