Gwamnan Jihar Zamfara, Dauda Lawal, ya yaba wa jami’ai da dakarun Rundunar Sojin Najeriya, ’Yan Sandan Najeriya da sauran hukumomin tsaro da suka rasa rayukansu yayin gudanar da ayyukansu, yana mai tabbatar da cewa sadaukarwar da suka yi domin dawo da zaman lafiya da tsaro a jihar ba za ta tafi a banza ba.
A cikin wata sanarwa da Babban Mataimaki na Musamman kan Harkokin Yaɗa Labarai ga Sakataren Gwamnatin Jihar Zamfara, Suleman Ahmad Tudu, ya sanya wa hannu, Gwamna Lawal—wanda Sakataren Gwamnatin Jihar, Malam Abubakar Mohammad Nakwada, ya wakilta ya bayyana bikin a matsayin wani muhimmin lokaci na tunani da nazari kan jarumtaka, kishin ƙasa da sadaukarwar da jami’an tsaro suka nuna wajen kare ƙasa.
Ya bayyana cewa Jihar Zamfara ta sha fama da matsalolin rashin tsaro a cikin ’yan shekarun nan, sakamakon ayyukan ’yan bindiga, ta’addanci da sauran laifuffuka, inda ya jaddada cewa jajircewa da ƙwazon Rundunar Sojoji da sauran hukumomin tsaro sun taka muhimmiyar rawa wajen ƙoƙarin dawo da zaman lafiya da kwanciyar hankali a jihar.
“Da dama daga cikin ’ya’yanmu maza da mata masu jarumta sun sadaukar da rayukansu a yayin ƙoƙarin dawo da zaman lafiya a al’ummominmu. A yau muna girmama jarumtakar su tare da sake tabbatar da aniyarmu ta haɗin kai wajen gina Jihar Zamfara mai aminci da ci gaba,” in ji gwamnan.
Gwamna Lawal ya kuma bayyana alhini da ta’aziyyarsa ga iyalan jaruman da suka rasa rayukansu, musamman gwauraye mata, gwauraye maza da kuma ’ya’yan da suka bari a baya, yana mai tabbatar da cewa gwamnatin jihar za ta ci gaba da tallafa wa shirye-shiryen da ke inganta walwala da jin daɗin rayuwarsu.
“Masoyanku ba su mutu a banza ba. Sun rasu ne suna hidimar al’umma tare da kare makomar mu baki ɗaya. Sadaukarwarsu ba za ta taɓa mantuwa ba, kuma tunawarsu za ta kasance sabuwa a zukatan al’umma masu godiya,” ya ƙara da cewa.
Gwamnan ya kuma yi kira ga al’ummar jihar da su bai wa hukumomin tsaro cikakken haɗin kai ta hanyar bayar da sahihan bayanai, yana mai jaddada cewa ɗaukar nauyin tsaro na bai ɗaya shi ne mabuɗin samun nasara a yaƙin da ake yi da rashin tsaro.
Haka kuma, ya sake jaddada ƙudurin gwamnatin jihar na ƙarfafa ayyukan tsaro ta hanyar inganta kayan aiki, kyautata walwalar jami’an tsaro da kuma amfani da dabarun tattara bayanan sirri na zamani.
Ranar Karrama Rundunar Sojoji na gudana duk shekara a faɗin Najeriya domin tunawa da jami’an Rundunar Sojoji da sauran hukumomin tsaro da suka rasu yayin aikin hidima, tare da girmama tsoffin sojoji da suka bayar da gudunmawa wajen kare haɗin kai da ’yancin kai na ƙasa.