Gwamnatin Indiya na fuskantar suka bayan bayyanar rahotanni da ke nuna cewa ana tattara bayanai da bibiyar masallatai a yankin Kashmir, matakin da ya janyo sabuwar fargaba game da tsauraran hanyoyin sa-ido da ake amfani da su a yankin.
A cewar bayanai, hukumomi na tattara cikakkun bayanai kan limamai, masu kula da masallatai, da irin huɗubobin da ake gabatarwa, tare da bin diddigin ayyukan addini. Wasu mazauna yankin sun ce hakan na faruwa ne ba tare da cikakken bayani ko shawarwari da al’umma ba.
Kungiyoyin kare hakkin dan Adam sun bayyana damuwa cewa wannan mataki na iya zama tauye ‘yancin addini da walwala, musamman a yankin da tuni ke fama da tsauraran matakan tsaro tun bayan soke ikon kai na musamman da Kashmir ke da shi a shekarar 2019.
Sai dai hukumomin Indiya sun kare matakin, suna cewa ana yin hakan ne domin kare tsaro da dakile tsattsauran ra’ayi, inda suka ce masallatai ba a ware su ba, illa dai ana bibiyar duk wata cibiya da ake zargin na iya haifar da barazanar tsaro.
Duk da haka, mazauna Kashmir da masu sharhi kan al’amuran siyasa na ganin wannan mataki na iya kara rura wutar rashin yarda tsakanin jama’a da gwamnati, tare da kara dagula halin da yankin ke ciki, musamman a bangaren zaman lafiya da hadin kai na al’umma.