An sake buɗe mashigar Rafah da ke tsakanin Gaza da Masar, amma damar zirga-zirga kaɗan ce kawai, a wani mataki da hukumomi suka ce an ɗauka ne domin dalilan jin kai da tsaro. Mashigar Rafah ita ce babbar hanyar da Gaza ke dogaro da ita wajen shiga da fita ba tare da wucewa Isra’ila ba.
Rahotanni sun nuna cewa buɗewar ta shafi marasa lafiya masu buƙatar kulawar gaggawa, ɗalibai, da wasu ‘yan ƙasashen waje, yayin da har yanzu aka takaita shigowar kayayyaki da yawan mutanen da za su rika wucewa. Hukumomin Masar da na Gaza sun ce ana kula da zirga-zirgar ne a matuƙar taka tsantsan.
Masu agajin jin kai sun bayyana cewa ko da yake buɗewar mashigar ta kawo ɗan sauƙi, amma hakan bai isa ba idan aka kwatanta da girman bala’in jin kai da ke fuskantar al’ummar Gaza. Sun ce dubban mutane na buƙatar fita domin neman magani, yayin da ake matuƙar buƙatar shigowar abinci, magunguna da kayan agaji.
A gefe guda, wasu mazauna Gaza sun nuna fargaba cewa buɗewar na iya zama na wucin gadi, ganin yadda mashigar ke yawan rufewa sakamakon rikici da matsin lamba na siyasa. Sun ce abin da suke fata shi ne a buɗe mashigar gaba ɗaya domin sauƙaƙa rayuwa.
Buɗe Rafah na zuwa ne a daidai lokacin da ake ci gaba da matsin lamba daga ƙasashen duniya da ƙungiyoyin kare haƙƙin bil’adama, waɗanda ke kira da a ba da cikakkiyar damar kai agaji da motsi ga al’ummar Gaza, domin rage wahalar da yaƙi da kullewa suka haddasa.