Hare-haren soji da United States da Israel suka kai kan Iran sun tayar da hankula kan tsaron Strait of Hormuz, wata muhimmiyar mashiga ta ruwa da ke da tasiri ga kasuwancin makamashi na duniya.
Mashigin Hormuz na hada Tekun Fasha da Tekun Larabawa, kuma kusan kashi daya cikin biyar na man fetur na duniya yana bi ta wannan hanya, tare da iskar gas (LNG). Duk wani tangarda, ko rikicin soji, ko takaita zirga-zirgar jiragen ruwa, na iya rage samar da mai a duniya.
Bayan tashin hankalin, kamfanonin jigilar mai da ‘yan kasuwar makamashi sun fara nuna damuwa. Ko da barazanar Iran ta dakile zirga-zirga a mashigin kadai na iya sa farashin mai ya tashi, saboda kasuwanni kan yi la’akari da yiwuwar karancin kaya.
Masana sun gargadi cewa idan rikicin ya dauki lokaci, farashin danyen mai na iya tashi matuka, lamarin da zai kara hauhawar farashi a duniya da kuma jefa tattalin arziki cikin matsin lamba. Hakan na iya kara kudin inshora ga jiragen ruwa da kuma kawo cikas ga kasashen da ke dogaro da shigo da makamashi.
Ko da yake cikakken rufe Mashigin Hormuz ba abu ne mai sauki ba saboda tasirin sa ga tattalin arzikin duniya, rikicin na nuna yadda tashin hankali a Gabas ta Tsakiya ke iya girgiza kasuwannin mai da tattalin arzikin duniya cikin gaggawa.