Mutum biyar na rundunar sojin saman India sun rasa rayukansu bayan wani jirgin sufuri kirar AN-32 ya yi hatsari a jihar Assam yayin wani atisayen tashi da sauka na yau da kullum.
Jirgin ya yi hatsarin ne a yankin Jorhat, kuma hotunan da suka fito daga wurin sun nuna tarkacen jirgin a warwatse a wani fili bayan faduwarsa.
Rundunar Sojin Sama ta Indiya ta tabbatar da mutuwar ma’aikatan biyar da ke cikin jirgin, tare da bayyana alhininta ga iyalan mamatan.
Rahotanni sun nuna cewa jirgin AN-32 na ƙoƙarin sauka ne a sansanin sojin sama da ke Jorhat lokacin da hatsarin ya afku. An ce mataimakin matuƙin jirgin ya tsira kuma yana samun kulawar likitoci.
Hukumomin sojin saman Indiya sun sanar da fara bincike domin gano musabbabin hatsarin da kuma hana sake faruwar irin wannan lamari a nan gaba.
Wannan hatsarin ya sake jawo hankali kan batutuwan tsaro a harkokin sufurin jiragen sojin saman Indiya, musamman bayan wasu hatsarori makamantan haka da suka faru a shekarun baya.