An Cire Sunan Donald Trump Daga Ginin Cibiyar Kennedy

WASHINGTON — Cire sunan Shugaba Donald Trump cikin sauri da asubancin ranar Asabar daga gaban babban ginin Cibiyar Gudanar da Wasanni da Al'adu ta John F. Kennedy, ya nuna wani gagarumin sauyi a damben shari'ar da ake yi kan ikon sarrafa gine-ginen gwamnati a birnin Washington.

Wannan mataki ya biyo bayan gazawar hukumar gudanarwar cibiyar wajen cika wa'adin da wani alƙalin tarayya ya ba su na sauke sunan, inda suka nemi ƙarin lokaci domin aiwatar da umarnin. Lauyoyin Ma'aikatar Shari'a da ke wakiltar cibiyar sun bayyana a daren ranar Juma'a cewa, ko da yake ana tsaka da aikin, hadarin tsawa da aka yi a yankin Washington ya janyo tsaiko. Sun ƙara da cewa ma'aikata na sa ran kammala cire sunan gaba ɗaya a "sanyayin safiyar" ranar Asabar.

Alƙalin Kotun Tarayya, Casey Cooper, ya sanya wa'adin tsakar dare da minti 59 na daren Juma'a a matsayin lokaci na ƙarshe da cibiyar za ta tabbatar da bin umarninsa. Kawo yanzu, alƙalin bai ba da amsa ga buƙatar cibiyar ta neman ƙarin lokaci don bayyana cewa ta cika umarnin ba.

Cire Sunan Cikin Sirri da Tsakar Dare

Ma'aikata sun fara kafa rumbun sikafo (scaffolding) a ƙarƙashin allon sunan ginin tun ranar Juma'a. Ana gobe gari ya waye, da misalin ƙarfe biyu na dare, sai ma'aikatan suka fara lulluɓe sikafo ɗin da kyalle, lamarin da ya katange yadda ake gudanar da aikin daga idon jama'a. Wannan mataki ya sa mutanen da ke taru a ƙasa suka barke da korafe-korafe suna rera muryoyin yin tir da lamarin.

Da misalin ƙarfe uku na dare, hotunan bidiyo da aka ɗauka ta wata ‘yar ƙaramar kofa a jikin lulluɓin sikafo ɗin sun nuna ma'aikata suna cire haruffan sunan.

Gabanin haka a ranar Juma'a, kotun ɗaukaka ƙara ta tabbatar da hukuncin alƙalin tarayya da ke tilasta wa Cibiyar Kennedy cire sunan shugaban ƙasar daga ginin kafin ƙarshen ranar Juma'a. Kotun ta yi watsi da yunƙurin ƙarshe na cibiyar na neman dakatar da hukuncin yayin da ake ci gaba da shari'a.

Kotun ɗaukaka ƙarar ba ta fito da takaitaccen dalilin yanke wannan hukunci ba a cikin gajeren umarninta da ba ta sanya wa hannu ba. Kwamitin alƙalan da suka yanke shawarar sun haɗa da Alƙali Gregory Katsas, wanda Trump ya naɗa; Patricia Millett, wadda tsohon Shugaba Barack Obama ya naɗa; da Robert Wilkins, shi ma wanda Obama ya naɗa.

Tushen Takaddamar Shari'ar

Hukuncin ya shafi cire sunan Trump daga ginin, shafin intanet, kayayyakin talle, da sauran wurare. Ko da yake ana sa ran ci gaba da takaddamar shari'ar a makonni masu zuwa, a halin yanzu fuskokin doka sun tilasta wa cibiyar ɗaukar matakan bin umarnin alƙalin ɗari bisa ɗari.

Cibiyar ta ɗauki matakai a kwanakin baya na soke sauye-sauyen a wasu wurare, amma ta bar haruffan da ke ɗauke da sunan “The Donald J. Trump and” a gaban ginin har zuwa lokacin da aka cire su da tsakar dare.

Yanzu haka alƙalan sun nemi ƙarin hujjoji na lauyoyi a rubuce da za a ƙaddamar a ƙarshen wannan wata kan buƙatar cibiyar ta neman dakatar da hukuncin ƙaramar kotun da ta ce lallai a cire sunan na Trump.