Sabbin hotunan tauraron ɗan'Adam sun nuna cewa Israel na ci gaba da gina ƙarin sansanonin soja da katanga a yankuna daban-daban na Gaza Strip, lamarin da ke ƙara tayar da damuwa kan yiwuwar tsawaita kasancewar sojojin Isra’ila a yankin.
Wani bincike da aljazeera.com ta gudanar ta amfani da hotunan Planet Labs da Sentinel Hub ya gano akalla sansanonin soja 40 da Isra’ila ta kafa ko kuma take faɗaɗawa a Gaza.
Rahotannin sun nuna cewa ana ƙarfafa sansanonin da sababbin hanyoyi, ramuka, katangogin ƙasa, hasumiyoyin sa ido, da wuraren da ake ganin za su iya zama sansanonin dindindin.
Hotunan tauraron dan adam sun kuma nuna faɗaɗa wuraren soja a yankunan Gaza City, Khan Younis, Rafah, da wasu sassan tsakiyar Gaza, inda ake ci gaba da rushe gine-gine da share ƙasa domin ayyukan soja.
Masana da ƙungiyoyin kare haƙƙin ɗan adam sun bayyana damuwa cewa wannan mataki na iya nuna shirin Isra’ila na ci gaba da rike wasu yankunan Gaza na dogon lokaci bayan yaƙin.
Firaministan Isra’ila, Benjamin Netanyahu, ya bayyana a baya cewa sojojin ƙasar na ƙoƙarin ƙara ikon Isra’ila zuwa kusan kashi 70 cikin 100 na Gaza domin hana barazanar hare-hare daga Hamas a nan gaba.
Sai dai Hamas da wasu ƙasashe da ƙungiyoyin duniya sun soki matakin, suna zargin Isra’ila da ƙoƙarin kafa sabon tsarin mamaya da tilasta wa Falasɗinawa ƙaura daga yankunansu.
Rikicin Gaza ya ci gaba da haddasa mummunar barna da matsalar jin kai, yayin da miliyoyin Falasɗinawa ke fama da ƙaura, ƙarancin abinci, ruwa, da magunguna.