Abuja – Israel Adekunle Adeniyi ya zama gwarzon ɗalibi na gaba ɗaya a Makarantar Koyon Aikin Lauya ta Najeriya (Nigerian Law School) a bikin kiran sabbin lauyoyi zuwa aikin lauya na shekarar 2026, inda ya ƙara wani babban tarihi a tafiyarsa ta ilimi da ta fara tun yana Jami'ar Ilorin.
Adeniyi, ɗan asalin garin Offa da ke Jihar Kwara, ya kammala shirin Bar Part II a reshen Legas na Makarantar Lauyoyi ta Najeriya. A bikin kiran sabbin lauyoyin na shekarar 2026, an ayyana shi a matsayin gwarzon ɗalibi na gaba ɗaya.
Kafin ya shiga Makarantar Lauyoyi ta Najeriya, Adeniyi ya kammala karatun digirinsa a fannin Common Law a Jami'ar Ilorin, inda ya zama gwarzon ɗalibi na ajinsa da matsakaicin maki (CGPA) na 4.83. Wannan shi ne mafi girman sakamakon da aka taɓa samu a tarihin Tsangayar Shari'a ta jami'ar.
Ƙungiyar Daliban Shari'a ta Jami'ar Ilorin na daga cikin waɗanda suka tabbatar da wannan gagarumar nasara.
A cikin wata sanarwa da ta wallafa a shafinta na X, ƙungiyar ta ce:
“Muna miƙa sahihan taya murna ga Israel Adekunle Adeniyi bisa fitowarsa a matsayin gwarzon ɗalibi na Makarantar Lauyoyi ta Najeriya. Muna alfahari da irin nasarorin da yake ci gaba da samu, waɗanda suka zama abin koyi da ƙarfafawa ga ɗalibai da dama.”
Biyo bayan wannan gagarumar nasara, Gidauniyar Abubakar Bukola Saraki ta karrama Adeniyi da kyautar kuɗi ta Naira miliyan biyu (₦2,000,000), a matsayin yabo ga ƙwazonsa da irin bajintar da ya nuna a harkar ilimi.