Babbar Kotun Tarayya da ke Abuja ta sanya ranar 7 ga Yuli, 2026, domin sauraron dukkan buƙatun da ke gaban kotu da kuma ci gaba da shari'ar da Kwamitin Amintattu (BoT) na Jam'iyyar Peoples Democratic Party (PDP) ya shigar, yana neman a tilasta wa Hukumar Zaɓe Mai Zaman Kanta ta Ƙasa (INEC) ta amince da kwamitin riƙon ƙwarya na jam'iyyar ƙarƙashin jagorancin Kabir Turaki.
Mai shari'a Salim Ibrahim ya sanya ranar ne a ranar Talata bayan ɓangarorin da ke shari'ar sun amince su musanya dukkan takardun shari'ar da suka rage kafin zaman na gaba.
Kotun ta umarci dukkan ɓangarorin da su shigar tare da miƙa takardunsu kafin ko a ranar 6 ga Yuli, tana mai gargaɗin cewa ba za ta ƙara amincewa da wani jinkiri ba.
Masu ƙarar na jayayya cewa ya kamata INEC ta amince da shugabancin riƙon ƙwaryar jam'iyyar tare da sabunta bayanan PDP da ke hannunta gabanin babban zaɓen shekarar 2027.
Sun kuma ce hukuncin kotuna da aka yanke a baya ya wajabta wa INEC ta aiwatar da hakan, domin a cewarsu waɗannan hukunce-hukuncen sun soke babban taron ƙasa na PDP da aka gudanar a shekarar 2025, tare da tabbatar da dakatar da wasu jami'an jam'iyyar.