Wani ƙudirin doka da ke gaban Majalisar Dattawan Amurka (US Senate) kan ƙara ƙaƙaba takunkumi ga Rasha na iya janyo harajin kashi 100 cikin 100 kan kayayyakin da ake shigowa da su daga ƙasashe kamar Indiya da China, idan suka ci gaba da sayen ɗanyen man fetur da sauran makamashi daga Rasha.
Manufar ƙudirin ita ce ƙara matsa wa Rasha lamba ta fuskar tattalin arziki, ta hanyar hukunta ƙasashen da ke ci gaba da sayen makamashinta. Masu goyon bayan ƙudirin sun ce irin waɗannan sayayya na taimaka wa Rasha samun kuɗaɗen da take amfani da su wajen ci gaba da yaƙinta da Ukraine.
Tun bayan ƙasashen Yamma sun kakaba wa Rasha takunkumi, Indiya da China sun zama daga cikin manyan masu sayen ɗanyen man fetur na Rasha mai rangwamen farashi. Idan ƙudirin ya zama doka, Amurka na iya kakaba harajin kashi 100 cikin 100 kan wasu kayayyakin da ake shigowa da su daga ƙasashen da suka ci gaba da irin waɗannan sayayyar. Sai dai yadda za a aiwatar da hakan zai dogara da irin sigar ƙarshe ta dokar da kuma matakan da gwamnatin Amurka za ta ɗauka.
Masu goyon bayan ƙudirin sun ce hakan zai rage kuɗaɗen shiga na Rasha tare da ƙarfafa tasirin takunkumin da aka riga aka kakaba mata. Amma masu adawa da shi sun yi gargaɗin cewa irin waɗannan haraji na iya kawo cikas ga kasuwancin duniya, ƙara tsadar kayayyaki ga masu amfani da kuma dagula dangantakar kasuwanci tsakanin Amurka da manyan ƙasashen duniya.
Indiya ta ce sayen makamashinta yana gudana ne bisa muradun ƙasa da kuma tabbatar da wadatar makamashi, yayin da China ita ma ta kare kasuwancinta da Rasha, tana mai cewa ya dace da dokokin ƙasa da ƙasa.
A halin yanzu, ƙudirin bai zama doka ba. Ko da Majalisar Dattawa ta amince da shi, har yanzu zai bi wasu matakan doka kafin ya fara aiki da kuma kafin a iya kakaba sabon harajin.