Wata ƙungiyar Kiristoci ta Netherlands mai suna Christians for Israel ta kai ƙarar gwamnatin ƙasar kan shirin hana shigo da kayayyakin da ake samarwa a matsugunan Isra'ila da ke Yammacin Gaɓar Kogin Jordan da aka mamaye. An tsara haramcin ya fara aiki a 22 ga Satumba 2026, kuma zai shafe shekaru uku.
Ƙungiyar ta kai ƙarar ne ta hannun wata cibiya mai suna Israel Product Centre (IPC), wadda ke cikin Christians for Israel. Cibiyar tana sayar da kayayyakin da ake samarwa a waɗannan matsugunan, ciki har da giya. Ta ce ba a ba ta isasshen lokaci na sayar da kayayyakin da take da su kafin haramcin ya fara aiki. A halin yanzu tana da kusan kwalaben giya 20,000 da take son ta sayar.
Me ƙungiyar ke ƙalubalanta?
Ƙungiyar ta yi hujja da cewa:
Lokacin da aka ba ta domin ta ƙare da kayanta ya yi kaɗan.
Haramcin na iya yin karo da ƙa'idar Tarayyar Turai (EU) ta zirga-zirgar kayayyaki cikin 'yanci.
Tana ganin matakin gwamnati mai son kai ne saboda ya shafi kayayyakin matsugunan Isra'ila kawai.
Me ya sa gwamnatin Netherlands ta sanya haramcin?
Matakin ya biyo bayan ƙarin matsin lamba kan ƙasashen Turai game da kasuwanci da kayayyakin da ake samarwa a matsugunan Isra'ila a yankunan Falasɗinawa da aka mamaye.
A Yuli 2024, Kotun Ƙasa da Ƙasa ta Shari'a (ICJ) ta bayar da ra'ayi cewa kasancewar Isra'ila a yankunan Falasɗinawa da aka mamaye ba bisa doka ba ne, kuma ta yi kira ga ƙasashe su guji hulɗar kasuwanci ko zuba jari da za ta taimaka wajen ci gaba da wannan halin.
Saboda haka, gwamnatin Netherlands ta ce haramcin wani ɓangare ne na matakan da take ɗauka dangane da matsugunan Isra'ila.
Me ya sa batun ya zama mai muhimmanci?
Batun ya wuce ƙarar wata ƙungiyar kasuwanci kawai. Ya shafi babbar muhawara kan matsugunan Isra'ila a Yammacin Gabar Kogin Jordan, dokokin ƙasa da ƙasa, da matsayin ƙasashen Turai game da ciniki da waɗannan matsuguna.
Netherlands na cikin ƙananan ƙasashen EU da suka ɗauki irin wannan mataki. Spain da Ireland ma sun riga sun kafa takunkumi kan shigo da kayayyakin da ake samarwa a matsugunan Isra'ila, yayin da wasu ƙasashen EU ke ci gaba da adawa da haramcin baki ɗaya.