Ministan harkokin cikin gida, Olubunmi Tunji-Ojo, ya dakatar da kwamandan Rundunar NSCDC ta Jihar Neja, Suberu Aniviye, bisa mutuwar wasu da ake zargi da haƙar ma’adinai ba bisa ka’ida ba.
An ce lamarin ya faru ne a yankin M.I. Wushishi/Lukoto da ke Minna, babban birnin jihar, bayan kama mutanen yayin samamen tabbatar da doka tsakanin 15 da 16 ga Satumba 2026.
Ministan ya kuma bayar da umarnin gudanar da cikakken bincike domin gano musabbabin mutuwar. Rahotanni sun ce aƙalla mutane 33 ne suka mutu a hannun hukumar, yayin da NSCDC ba ta tabbatar da adadin ba.
Tun da farko, NSCDC ta kafa kwamitin bincike da zai duba yanayin waɗanda aka kama, tsawon lokacin da suka yi a tsare, yanayin wurin tsarewar da kulawar lafiya da aka ba su.
Hukumar ta kuma yi gargadin cewa kada a yi hasashen musabbabin mutuwar, har sai an kammala binciken lafiya da na dakin gwaje-gwaje.