Shugabar kamfanin Tesla, Robyn Denholm, ta gargaɗi masu hannun jarin kamfanin cewa Elon Musk, wanda shi ne babban jami’in gudanarwa na Tesla, zai iya barin kamfanin idan ba a amince da sabon tsarin biyan albashin da ya kai dala tiriliyan ɗaya ba.
Denholm ta bayyana cewa wannan tsarin biyan albashi ba wai kawai lada ne ba, amma babban dalilin da ke sa Musk ya ci gaba da jajircewa wajen ci gaban kamfanin. Ta ce: “Elon mutum ne mai hangen nesa da nufin canza duniya. Idan ba mu nuna masa cewa muna tare da shi ba, akwai yiwuwar ya fice ya mayar da hankali kan wasu ayyukansa kamar SpaceX da X (Twitter).”
Rahotanni sun nuna cewa tsarin biyan albashin na Musk wanda ya kai kusan dala biliyan 56 (kimanin tiriliyan ɗaya da ɗan kai na naira) ya jawo cece-kuce tsakanin masu hannun jari da hukumomin kula da kasuwanci. Wasu na ganin adadin ya yi yawa fiye da kima, yayin da wasu ke cewa ya dace da irin gudunmawar da Musk ke bayarwa wajen haɓaka kamfanin.
Masana tattalin arziki na cewa idan kamfanin Tesla bai amince da wannan tsarin ba, hakan na iya haifar da tasiri mai tsanani a kasuwar hannun jari da kuma makomar kamfanin gaba ɗaya, tunda Musk shi ne ginshiƙin nasarar da Tesla ta samu a duniya.