Rahotanni daga Gabas ta Tsakiya sun nuna cewa sojojin Isra’ila sun kashe wani ɗan Falasɗinu a birnin Gaza yayin da harin da suke kaiwa yankin ke ci gaba da yin muni.
A lokaci guda, Hamas ta mayar da gawarwakin mutane uku da ta ce dukkansu sun mutu sakamakon hare-haren Isra’ila a yankin.
Majiyoyi daga cikin Gaza sun tabbatar da cewa mutanen da suka mutu sun haɗa da fararen hula, ciki har da wani ma’aikacin lafiya da ya ke taimaka wa wajen ceto rayuka kafin harin ya rutsa da shi.
A cewar rahoton tashar Al Jazeera, Isra’ila ta ce hare-haren nata na da nufin dakile ragowar mayakan Hamas da ke ɓoye a sassan birnin, sai dai hukumomin lafiya a Gaza sun ce mutane da dama da ba su da laifi ke fuskantar illar wannan farmaki.
A gefe guda, Hamas ta tabbatar da mayar da gawarwakin mutum uku ga hukumomin Gaza, tana mai cewa za ta ci gaba da neman sauran mutanen da suka ɓace ko suka mutu sakamakon hare-haren da Isra’ila ke kaiwa tun watanni da dama.
Yanzu haka, yanayin tsaro a Gaza ya taɓarɓare, yayin da ake ci gaba da ganin ƙarin tashe-tashen hankula tsakanin ɓangarorin biyu.