Jami’in Jinkai Na ADC Ya Nemi A Sake Duba Shari’ar Shugabancin Jam’iyyar

Jami’in kula da jinƙai na ƙasa na jam’iyyar African Democratic Congress (ADC), Nkemakolam Ukandu, ya roƙi babban mai shari’a na Babban Kotun Tarayya da ke Abuja da ya sake ɗora shari’ar shugabancin jam’iyyar a gaban wani alƙalin daban, yana zargin rashin adalci a shari’ar.

Ukandu, wanda shi ne wanda ake kira na shida a cikin shari’a mai lamba FHC/ABJ/CS/1331/2025 — Dubem Kachukwu da wasu huɗu sukan Hukumar Zaɓe Mai Zaman Kanta (INEC) da wasu biyar — ya ce ba zai iya samun adalci ba a gaban Mai shari’a James Omotosho na kotu ta 7.

A cikin buƙatarsa da lauya Kalu Kalu Agwu ya gabatar bisa Order 49 Rule 1 na dokokin gudanar da shari’a na Babban Kotun Tarayya (2019), Ukandu ya nemi a canza alƙalin da ke sauraron shari’ar ko kuma a dakatar da ci gaban shari’ar har sai babban mai shari’a ya yanke hukunci kan buƙatarsa.

Ya zargi kotun da nuna “son kai ko yiwuwar nuna son kai” bayan da alƙalin ya rage masa lokacin da doka ta tanadar na kwana 30 don gabatar da kariya zuwa kwana bakwai kacal, ciki har da Asabar da Lahadi, ba tare da wata takardar neman rage lokaci daga kowane lauya ba.

Ukandu ya bayyana cewa an haɗa shi cikin shari’ar ne a ranar 3 ga Oktoba, kuma duk da cewa kotu ta umarci lauya mai ƙarar da ya gyara takardun ƙarar ya kuma miƙa musu sabbin kwafe, an isar masa da su ne kawai a ranar 22 ga Oktoba, kwana guda kafin sauraron ƙarar.

Ya ce tun da shari’ar ba ta da iyaka ta lokaci, rage masa lokacin da kotu ta yi ya keta masa haƙƙin samun adalci kuma ya hana shi damar gabatar da cikakkiyar kariya.