Sakamakon yanayin tsaro da ake ciki a Zirin Gaza, yanbindigar da ke yankin yanzu ba wasu shahararru ba ne, ƙananan ƙungiyoyi ne na dangi-dangi da ke adawa da Hamas.
Ƙungiyoyin kan yi iko da abubuwa da yankuna daban-daban, inda suke biyayya ga dangi da 'yan'uwansu.
Amma me muka sani game da waɗannan ƙungiyoyi?
Ƙungiyar dangin Daghmash na ɗaya daga cikin mafiya girma tsakanin zuri'ar Falasɗinawa a Zirin Gaza, inda aka yi ƙiyasin suna da mayaƙa 3,000 a Gaza, da kuma 1,500 a wajensa.
Ta fi ƙarfi a unguwannin Sabra da Tel al-Hawa da ke Birnin Gaza. A cewar jagoran zuri'ar mai suna Salah Daghmash lokacin da yake hira da 'yanjarida a 2007, mambobinta na bin jam'iyyar siyasa daban-daban, kamar Hamas da Fatah, da Popular Front for the Liberation of Palestine.
Mambobin ƙungiyar sun sha gwabzawa da Hamas, musamman bayan Hamas ta kama iko da Gaza a 2007.
Gwabzawar ta fi faruwa a unguwannin Sabra da Tel al-Hawa bayan mambobinta sun ƙi amincewa su miƙa makamansu.