Rikicin Sudan ya sake tsananta yayin da Rundunar Sojan Sudan (SAF) ta bayyana cewa ta kwato wasu muhimman yankuna biyu a Jihar Arewa Kordofan, bayan makonni na faɗa mai zafi da Rundunar RSF ke yi.
A cewar majiyoyin soja, dakarun SAF sun kutsa cikin yankunan ne bayan artabun da ya daɗe yana gudana, inda suka kori mayakan RSF suka kuma sake karɓe muhimman hanyoyi da ake amfani da su wajen jigilar kayayyaki. Sojojin sun ce wannan ci gaba na daga cikin ƙoƙarin da suke yi na dawo da yankunan da suka fadi a baya.
Sai dai kuma rahotanni masu tayar da hankali suna ci gaba da fitowa daga yankunan da RSF ke iko da su, inda ake zargin mayakan RSF da kona gawawwakin mutanen da aka kashe, ciki har da fararen hula da sojoji. Shaidu sun ce an sake samun irin wannan mummunan lamari a yankunan da RSF ta mamaye kwanan nan, lamarin da ya kara tsananta fargaba game da cin zarafin bil’adama.
Kungiyoyin agaji sun yi gargadin cewa halin da ake ciki a Arewa Kordofan yana kara muni, domin dubban fararen hula suna makale, babu isasshen magani ko abinci, kuma fadan na kara bazuwa a yankunan da dama.
Yayinda bangarorin biyu ke cigaba da zargin juna, kira na kasa da kasa da ake ta yi na tsagaita wuta da bai wa kungiyoyin agaji damar shiga, har yanzu basu kai ga dakile tashin hankalin ba. Wannan rikici, wanda ya shafe sama da shekara guda, na cigaba da bazuwa, yana barazanar haifar da karin tabarbarewar tsaro a Sudan.