Zanga-zanga Ta Barke A Hedikwatar PDP Yayin Da Bangaren Abdulrahman Ya Karɓi Iko

Zanga-zanga ta ɓarke a ranar Litinin a hedikwatar jam’iyyar Peoples Democratic Party (PDP) da ke Wadata Plaza, Abuja, yayin da magoya bayan sabon muƙaddashin shugaban jam’iyyar, Mohammed Abdulrahman, suka mamaye harabar ginin.

Masu zanga-zangar, waɗanda ke rera wakokin goyon baya, sun buƙaci Kwamitin Aiki na ƙasa (NWC) da Umar Damagum ke jagoranta da ya bar ofis ɗin jam’iyyar nan take.

A rahoton da PUNCH Online ta bayar a baya, an bayyana Abdulrahman a matsayin muƙaddashin shugaban jam’iyyar makon da ya gabata, bayan da aka dakatar da Sakataren Jam’iyya na ƙasa, Sanata Samuel Anyanwu, da Mai ba da shawara kan harkokin shari’a, Kamaldeen Ajibade, na tsawon wata guda  lamarin da ya ƙara dagula rikicin shugabanci a jam’iyyar.

A wani ɓangare daban, ɓangaren jam’iyyar da ke goyon bayan Ministan Babban Birnin Tarayya (FCT), Nyesom Wike, ya gudanar da taro a wani wuri dabam a Abuja, inda ya sanar da dakatar da NWC da Damagum ke jagoranta.

Masu zanga-zangar sun zargi jagorancin Damagum da rashin tafiyar da harkokin jam’iyyar yadda ya kamata, tare da alwashin kwace ikon hedikwatar don mika shi ga ɓangaren Abdulrahman.

Jami’an tsaro sun mamaye yankin domin hana tashin hankali yayin da ɓangarorin biyu ke fafatawa kan wanda zai riƙe ikon ginin jam’iyyar.

A halin yanzu, ɓangaren Abdulrahman ya karɓi ikon ofishin Shugaban Jam’iyya na ƙasa. Da yake magana da manema labarai, Abdulrahman ya yi alƙawarin haɗa kan ’ya’yan jam’iyyar da kuma farfaɗo da ita a shirye-shiryen babban zaɓe mai zuwa.

“Mun shirya yin aiki don ci gaban jam’iyyarmu mai daraja,” in ji shi.