Babban kamfanin fasaha na duniya, Meta, ya sanar da cewa ya sayi kamfanin ƙirƙirarriyar basira (AI) Manus, wani kamfani da ’yan asalin ƙasar China suka kafa, a wani mataki da ke ƙara nuna tsananin gasa a fagen fasahar AI a duniya.
Rahotanni sun bayyana cewa sayen Manus zai bai wa Meta damar ƙarfafa ayyukanta na AI, musamman a ɓangaren nazarin bayanai, koyon inji (machine learning) da kuma haɓaka sabbin manhajoji masu amfani da basirar kwamfuta.
Manus dai ya shahara wajen ƙirƙirar sabbin dabarun AI da ake amfani da su a fannoni kamar fasahar sadarwa, kasuwanci da kuma nazarin harsuna. Masana na ganin wannan mataki zai taimaka wa Meta wajen yin gogayya da sauran manyan kamfanoni kamar Google, Microsoft da OpenAI.
Sai dai sayen kamfanin da ke da tushe a China ya haifar da tambayoyi daga wasu masana da hukumomi, musamman game da tsaro, bayanan sirri da tasirin siyasa, duba da tsauraran dokoki da ke kewaye da fasahar AI a kasashe da dama.
Meta ta ce za ta tabbatar da cewa dukkan ayyukan Manus za su bi ƙa’idojin kasa da kasa, tare da kiyaye dokokin kare bayanan masu amfani, tana mai jaddada cewa burinta shi ne inganta fasaha domin amfanin al’umma baki ɗaya.