Wani Mulhidi mai suna Mati Mubarak Sodangi ya kalubalanci wani Dan Boko Aqeeda mai kiran kansa Musulmi, mai suna Garba Sufiy.
Mati Mubarak ya ce: Kai Garba Sufiy, Kana karyar kai secularist
ne, alhali kuma ga abin da Alkur'aninku ya ce:
{
إِنَّا أَنْزَلْنَا إِلَيْكَ الْكِتَابَ بِالْحَقِّ لِتَحْكُمَ بَيْنَ النَّاسِ
بِمَا أَرَاكَ اللَّهُ } [النساء: 105]
"Lallai mu muka saukar da Littafi gare ka da gaskiya, don
ka yi hukunci tsakanin mutane da abin da Allah ya nuna maka".
To ashe a cikin Alkur'aninku aka ce a yi hukunci da Alkur'anin
naku, alhali kai kuma ka zo kana cewa; hukunci da Constitution ne kawai ya dace
da wannan zamani.
To kenan kai ba ka bin littafin Addinin naka kenan.
Garba Sufiy ya ce: Ai wannan a can zamanin Annabi ne ba a
wannan zamanin ba.
Mati Mubarak ya ce: To a ina aka fadi haka a cikin Alkur'anin
naku ko Hadisin Annabin naku?
Garba Sufiy ya ce: Ai ba sai an fadi hakan ba, saboda kowane
hukunci yana dacewa ne da zamaninsa. Yanzu kuma wannan zamani bai dace da
hukunci da Alkur'ani ba.
Mati Mubarak ya ce: Haba Garba Sufiy wannan abin da ka fada
kowane Musulmi ya san karya kake yi.
Garba Sufiy ya yi shiru ya rasa bakin magana.
Sai Mati Mubarak ya ce: Bayan wannan kuma, kai Garba Sufiy kana
karyar humanity amma a Alkur'anin da ka yarda da shi an ce a kashe kafirai,
kuma a ki su a yi gaba da su. Kuma duk mai son kafirai Munafiki ne. A Kur'anin
naku aka ce:
{بَشِّرِ
الْمُنَافِقِينَ بِأَنَّ لَهُمْ عَذَابًا أَلِيمًا (138) الَّذِينَ يَتَّخِذُونَ
الْكَافِرِينَ أَوْلِيَاءَ مِنْ دُونِ الْمُؤْمِنِينَ أَيَبْتَغُونَ عِنْدَهُمُ
الْعِزَّةَ فَإِنَّ الْعِزَّةَ لِلَّهِ جَمِيعًا (139)} [النساء: 138، 139]
"Ka yi bushara ga Munafukai cewa; suna da azaba mai
radadi. Su ne wadanda suke rikan Kafirai masoya ba Muminai ba. Shin daukaka
suke nema a wajensu ne? alhali daukaka gaba dayanta ta Allah ce".
Don haka Garba Sufiy kai Munafiki ne a Musluncin naku, saboda
kana cewa; kana son kafirai.
To me za ka ce a nan?
Garba Sufiy ya ce: A'a, ai su ma kafiran mutane ne, ni ba zan
ki mutum ba.
Mati Mubarak ya ce: Tun da kai ka yarda da Muslunci da
Alkur'ani da Allan Musulmai, to ga shi Allan ya ce kai Munafuki ne, tun da kana
son kafirai.
Nan da nan sai Garba Sufiy ya fara hayaniya, yana zagin Mati
Mubarak yana cewa; ai kai ba ka fahimci Alkur'anin ba.
Haka dai tattaunawar ta zo karshe, Mati Mubarak Sodangi yana so
ya ja Garba Sufiy ga Addininsa na Ilhadi da kafirce ma dukkan Addinai da
inkarin samuwar Allah.
To jama'a, kun ga dai yadda ta kaya, Garba Sufiy ya shiga tsaka
mai wuya, shi ba Mulhidi cikakke ba, kuma ba Musulmi cikakke ba, shi ya sa
Mulhidin ya tabbatar da cewa; shi Munafiki ne a cikin Musulmai.
Allah ya yi mana tsari da tabewa.
Daga zauren Dr. Aliyu Muhammad Sani
