Al’ummar Colombia na shirin kaɗa ƙuri’a a wani zaɓen shugaban ƙasa da ake kallon sa a matsayin ɗaya daga cikin mafi muhimmanci a tarihin ƙasar na baya-bayan nan, yayin da manyan ‘yan takara ke gabatar da manufofi mabambanta kan tsaro, tattalin arziki, da makomar yarjejeniyar zaman lafiya.
Zaɓen ya fi karkata ne tsakanin ɗan takarar hagu Iván Cepeda da kuma manyan ‘yan takarar dama irin su Abelardo de la Espriella da Paloma Valencia.
Iván Cepeda, wanda ke samun goyon bayan shugaban ƙasa mai barin gado Gustavo Petro, na goyon bayan ci gaba da tsarin “Total Peace”, wato tattaunawa da ƙungiyoyin masu ɗauke da makamai domin rage rikici a ƙasar. Masu goyon bayansa sun ce tsarin zai taimaka wajen kawo zaman lafiya mai ɗorewa da rage tashin hankali.
Sai dai masu adawa da wannan tsari suna zargin cewa wasu ƙungiyoyin masu ɗauke da makamai sun yi anfani da yarjejeniyoyin tsagaita wuta wajen ƙara ƙarfafa ikonsu, musamman a yankunan da ake fama da safarar miyagun ƙwayoyi da rikicin ‘yan tawaye.
A gefe guda kuma, Abelardo de la Espriella da Paloma Valencia na kira da a dawo da tsauraran matakan tsaro, tare da ƙara ƙarfin soja wajen yaƙi da ƙungiyoyin masu ɗauke da makamai da masu safarar miyagun ƙwayoyi.
Tsaro ya zama babban batu a yakin neman zaɓen saboda ƙaruwa a hare-haren ‘yan tawaye, kashe-kashen siyasa, da rikice-rikicen da suka addabi wasu yankuna na ƙasar a ‘yan watannin nan.
Tattalin arziki ma na daga cikin manyan batutuwan da suka mamaye zaɓen, inda ake muhawara kan yadda za a tafiyar da albarkatun ƙasa, makamashi, haraji, da samar da ayyukan yi.
Masu sa ido kan siyasa sun bayyana cewa sakamakon zaɓen zai iya sauya alkiblar Colombia ta fuskar tsaro, tattalin arziki, da hulɗarta da ƙasashen duniya, musamman yayin da ƙasar ke fama da rikicin cikin gida da matsin tattalin arziki.