Hamas ta bayyana cewa ba za ta miƙa makamanta ba, amma ta ce jami’an ‘yan sanda ne kaɗai za su riƙa ɗaukar makamai a bainar jama’a a yankin Gaza Strip idan an samu sabon tsarin mulki bayan yaƙi.
Ƙungiyar ta ce reshen sojinta da makamanta suna da muhimmanci wajen abin da ta kira gwagwarmayar kare Falasɗinawa daga Israel, saboda haka ba za ta amince da kwace makamanta gaba ɗaya ba.
Sai dai jami’an Hamas sun nuna cewa kula da tsaro da tabbatar da doka a cikin Gaza zai kasance a hannun ‘yan sanda na hukuma maimakon ƙungiyoyin masu ɗauke da makamai a cikin al’umma.
Wannan bayani na zuwa ne yayin da ake ci gaba da tattaunawa kan yadda za a tafiyar da Gaza bayan watanni na yaƙi tsakanin Isra’ila da Hamas.
Masu shiga tsakani na duniya da wasu ƙasashe sun sha yin kira da a cire duk wani makami daga Gaza a matsayin wani ɓangare na yarjejeniyar tsagaita wuta ko zaman lafiya na dindindin.
Sai dai Hamas ta dage cewa makamanta ba abin tattaunawa ba ne, tana mai cewa cire makamai zai bar Falasɗinawa cikin rashin kariya.
Jami’an Israel kuwa na ci gaba da neman a rushe duk wani ƙarfin soja na Hamas, suna cewa ba za a samu zaman lafiya mai ɗorewa ba muddin ƙungiyar na da makamai.
Masana siyasa sun ce kalaman Hamas na nuna irin ƙalubalen da ke gaban tattaunawar makomar Gaza, musamman kan batun tsaro, shugabanci, da rawar da ƙungiyoyin masu ɗauke da makamai za su taka bayan yaƙin.
Rikicin ya haddasa mummunar barna a Gaza tare da ƙara muhawara a duniya kan yadda za a gudanar da yankin bayan ƙarshen faɗace-faɗacen.