Iran Ta Zargi Amurka da Keta Yarjejeniyar Zaman Lafiya Bayan Sabbin Hare-Hare

Iran ta zargi Amurka da karya yarjejeniyar zaman lafiya da aka cimma tsakanin ɓangarorin biyu domin kawo ƙarshen yaƙin Gabas ta Tsakiya, bayan sabbin hare-haren da sojojin Amurka suka kai kan wasu wurare a ƙasar.

A cikin wata sanarwa da Ma'aikatar Harkokin Wajen Iran ta fitar a ranar Asabar, ta bayyana hare-haren a matsayin "babban take yarjejeniyar fahimtar juna" da aka rattabawa hannu domin kawo ƙarshen rikicin.

Sanarwar ta ce hare-haren sun yi niyya ne kan cibiyoyin sa ido da tsaron gabar tekun Iran, tare da bayyana su a matsayin zalunci da ya saɓa wa yarjejeniyar zaman lafiya da aka cimma tsakanin ɓangarorin.

Sai dai sojojin Amurka sun ce hare-haren da suka kai a ranar Juma'a sun nufi ma'ajiyar makamai masu linzami da jiragen yaƙi marasa matuƙa (drones), da kuma cibiyoyin radar da ke gabar tekun Iran.

A cewar Amurka, an kai hare-haren ne a matsayin martani ga wani hari da Iran ta kai kan wani jirgin dakon kaya da ke wucewa ta mashigar ruwan Strait of Hormuz, wata muhimmiyar hanyar safarar mai da kasuwanci ta duniya.