Tsohon Mataimakin Shugaban Ƙasa, Atiku Abubakar, ya soki Fadar Shugaban Ƙasa kan amfani da dokokin ƙasar China wajen kare Shugaba Bola Ahmed Tinubu, yana mai cewa hakan ya ƙara jawo hankalin jama'a kan zarge-zargen da suka shafi tarihin shugaban.
Tun da farko, Fadar Shugaban Ƙasa ta mayar da martani ga Atiku kan rahotannin cewa ƙungiyar masu fafutukar goyon bayansa a Amurka ta miƙa koke ga Shugaba Donald Trump da Ma'aikatar Harkokin Wajen Amurka kan batun kwace dala 460,000 a wata shari'ar farar hula da aka gudanar a shekarar 1993, wadda ta shafi Bola Tinubu, tare da wasu batutuwa.
A wata sanarwa da Babban Mataimaki na Musamman ga Atiku kan Hulɗa da Jama'a, Phrank Shaibu, ya fitar a ranar Asabar, ya ce maimakon Fadar Shugaban Ƙasa ta yi bayani kan muhimman batutuwan da aka taso da su, sai ta mayar da hankali wajen cin zarafin Atiku.
Sanarwar ta ce: "Lokacin da gwamnati ta daina amfani da hujjoji ta koma zagi da cin mutunci, hakan na nuna cewa ta rasa amsoshin da za su gamsar da jama'a."
Atiku ya ce yunƙurin da Fadar Shugaban Ƙasa ta yi na cin ribar siyasa ya koma mata baya, domin ya ƙara jefa shugaban cikin ƙarin tambayoyi daga jama'a.
Ya ce: "Abin mamaki ne yadda mai magana da yawun shugaban ƙasa ya yi ƙoƙarin amfani da dokokin China wajen kai hari ga Atiku, amma daga ƙarshe ya jefa shugaban da yake karewa cikin wannan muhawara."
Ya ƙara da cewa mafi girman hukuncin da dokokin China suka tanada kan manyan laifukan safarar miyagun ƙwayoyi shi ne hukuncin kisa. Don haka, ambaton China ya sa mutane suka fara kallon lamarin daga wannan mahanga.
Atiku ya jaddada cewa bai taɓa gurfana a gaban kotu ko kuma samun hukuncin laifi kan cin hanci, safarar miyagun ƙwayoyi ko wani laifi a Najeriya ko wata ƙasa ba.
Ya ce: "Gaskiyar magana ita ce Atiku Abubakar bai taɓa kasancewa wanda wata kotu ta same shi da laifin cin hanci, miyagun ƙwayoyi ko wani laifi ba a ko'ina cikin duniya."
Har ila yau, ya ce idan gwamnatin Tinubu tana son amfani da China a matsayin ma'aunin ɗaukar alhaki, to ya dace a tambayi yadda hukumomin China za su yi mu'amala da batun kwace dala 460,000 da gwamnatin Amurka ta yi a wata shari'ar farar hula kan kuɗaɗen da ake zargin suna da alaƙa da safarar miyagun ƙwayoyi da kuma wanke kuɗaɗe.
A cewarsa, China ta shahara wajen ɗaukar tsauraran matakai kan laifukan miyagun ƙwayoyi da kuma yaƙi da cin hanci, inda bincike kan irin waɗannan batutuwa ba ya ƙarewa da kwace kadarori kawai.
Atiku ya kuma zargi gwamnatin Tinubu da gaza tabbatar da gaskiya da riƙon amana, yana mai cewa a tsarin China, zarge-zargen karkatar da kasafin kuɗi, amfani da ofis ba bisa ƙa'ida ba da kuma ƙirƙirar hukumar gwamnati ta bogi za su fuskanci matakin gaggawa.
Ya kuma ce bai dace Fadar Shugaban Ƙasa ta riƙa nuna martanin gwamnatin Amurka ga wasiƙun diflomasiyya a matsayin hujjar wanke shugaban daga zargi ba.
A cewarsa: "Mu'amalar diflomasiyya tsakanin ƙasashe ba hukuncin kotu ba ne, kuma ba ta tabbatar da rashin laifi ko sake rubuta tarihin abin da ya faru."
Atiku ya buƙaci gwamnatin Tinubu ta karkata hankalinta wajen magance matsalolin tattalin arziki, yunwa, rashin tsaro da tabarbarewar cibiyoyin gwamnati maimakon shiga cece-kuce na siyasa.
Wannan musayar kalamai ita ce sabon babi a takaddamar da ke tsakanin Fadar Shugaban Ƙasa da 'yan adawa kan batutuwan da suka shafi tarihin shari'un Shugaba Tinubu a Amurka.
Takaddamar ta sake ɗaukar zafi ne bayan Fadar Shugaban Ƙasa ta ce martanin hukumomin Amurka ga tambayoyin diflomasiyya ya nuna cewa babu wata shari'ar laifi da ke kan Shugaba Tinubu.
Sai dai Atiku ya yi watsi da wannan hujja, yana mai cewa amfani da China a matsayin misali ya ƙara jawo hankalin jama'a saboda tsauraran dokokin ƙasar kan miyagun ƙwayoyi da kuma yaƙi da cin hanci.
A wani saƙo da mai magana da yawun Shugaban Ƙasa, Bayo Onanuga, ya wallafa a shafinsa na X a ranar Juma'a, ya zargi Atiku da aikata almundahana lokacin da yake Mataimakin Shugaban Ƙasa.
Onanuga ya ce Atiku ya jagoranci wata manhajar sayar da kadarorin gwamnati da ta jawo asarar ayyukan yi, tare da haifar da matsalolin rashin biyan albashi da fansho.
Ya ƙara da cewa: "Mutumin da ke da irin wannan tarihi bai cancanci neman kuri'ar 'yan Najeriya ba. Da a ce Atiku ɗan ƙasar China ne, da tuni yana gidan yari saboda abin da ya aikata wa al'ummar Najeriya."