Asusun ba da Lamuni na Duniya (IMF) ya rage hasashen ci gaban tattalin arzikin duniya na shekarar 2026, yana mai cewa rikicin yaƙin da ya shafi Iran da tasirinsa kan kasuwannin makamashi sun raunana hasashen bunƙasar tattalin arzikin duniya. IMF ta bayyana cewa hauhawar farashin mai, tangarɗar hanyoyin samar da kayayyaki, sun taka rawa wajen rage hasashen.
A cewar IMF, ana sa ran tattalin arzikin duniya zai bunƙasa da kashi 2.8% a shekarar 2026, maimakon hasashen farko na 3.1%. Hukumar ta ce wannan raguwar na nuna illar rikicin Iran, tsauraran yanayin kuɗi, da kuma raguwar zuba jari da amincewar masu amfani da kayayyaki a ƙasashe da dama.
IMF ta kuma bayyana cewa rikicin da ya shafi Mashigin Hormuz, wata muhimmiyar hanyar jigilar man fetur ta duniya, ya haddasa tashin farashin makamashi. Hakan ya ƙara tsadar samar da kayayyaki da sufuri, wanda ke ƙara matsin lamba ga tattalin arzikin ƙasashe masu dogaro da shigo da makamashi.
Hukumar ta yi gargadin cewa ƙasashe masu tasowa ne za su fi fuskantar matsala, domin da dama daga cikinsu na fama da dimbin bashi, tsadar lamuni, da raguwar buƙatar kayayyakin da suke fitarwa zuwa ƙasashen waje. Haka kuma, ƙasashe masu ƙarfin tattalin arziki kamar Amurka da wasu ƙasashen Turai ma za su fuskanci raguwar bunƙasa sakamakon tsadar makamashi da kuma ci gaba da rashin tabbas a kasuwannin duniya.
Sai dai IMF ta ce akwai yiwuwar tattalin arzikin duniya ya farfaɗo idan rikice-rikicen siyasa sun lafa, farashin makamashi ya daidaita, kuma gwamnatoci suka ci gaba da aiwatar da manufofin da za su ƙarfafa zuba jari tare da shawo kan hauhawar farashin kayayyaki. Duk da haka, ta yi gargaɗin cewa duk wani sabon tashin hankali a Gabas ta Tsakiya na iya ƙara raunana tattalin arzikin duniya tare da haifar da ƙarin rashin daidaito a kasuwannin kuɗi.