Tarayyar Turai (EU) ta ƙaƙaba takunkumi kan mutane tara da ake zargi da hannu a wani shirin leƙen asiri na intanet da ake dangantawa da Rasha, wanda aka ce ya shafi ƙasashe da hukumomi a Turai.
EU ta bayyana cewa mutanen da aka kakabawa takunkumin suna da alaƙa da ayyukan kutse ta intanet da aka yi domin satar bayanai masu muhimmanci, kawo cikas ga tsarin kwamfuta na gwamnati, da kuma yin tasiri kan harkokin siyasa a wasu ƙasashen Turai.
Takunkumin da aka ɗauka ya haɗa da daskarar da kadarori da kuma hana waɗannan mutane shiga ƙasashen Tarayyar Turai.
Jami'an EU sun ce wannan yaƙin leƙen asiri ta intanet wani ɓangare ne na yunƙurin da ake zargin Rasha na yi domin raunana tsaron Turai da tsarin dimokuraɗiyya. Sun ce hare-haren sun shafi hukumomin gwamnati, ƙungiyoyin siyasa da kuma wasu muhimman sassa.
Wannan matakin na daga cikin martanin da Tarayyar Turai ke ɗauka kan abin da ta bayyana a matsayin ƙarin barazanar intanet daga Rasha, da suka haɗa da kutse ta yanar gizo, leƙen asiri da kuma yaɗa bayanan ƙarya.
Jami'an EU sun ce za su ci gaba da ɗaukar matakai kan mutane da ƙungiyoyin da suke ganin suna barazana ga tsaron ƙungiyar.
A nata ɓangaren, Rasha ta sha musanta zarge-zargen kai hare-haren intanet a kan ƙasashen Turai, tana ƙaryata cewa tana amfani da kutse ta yanar gizo a matsayin wata manufar gwamnati.