Shuwagabanni da jami'ai daga sassa daban-daban na duniya sun bayyana alhininsu bayan rasuwar Sheikh Hamad bin Khalifa Al Thani, tsohon Sarkin Qatar, wanda ya rasu yana da shekaru 74. Fadar masarautar Qatar (Amiri Diwan) ta sanar da rasuwarsa a ranar Lahadi, tana mai bayyana shi a matsayin ɗaya daga cikin shuwagabannin da suka fi sauya fasalin ƙasar, tare da ayyana zaman makoki na ƙasa.
Sarkin Qatar na yanzu, Sheikh Tamim bin Hamad Al Thani, ya nuna baƙin cikinsa kan rasuwar mahaifinsa, yana mai yabawa da irin gudummawar da ya bayar wajen gina Qatar ta zamani. Sheikh Hamad ya mulki ƙasar daga 1995 zuwa 2013, inda ya jagoranci bunƙasar tattalin arziki ta hanyar arzikin iskar gas, ya kafa tashar talabijin ta Al Jazeera, ya kuma ƙara wa Qatar tasiri a harkokin duniya kafin ya miƙa mulki ga ɗansa a shekarar 2013.
Firaministan Indiya Narendra Modi ya bayyana Sheikh Hamad a matsayin “shugaba mai hangen nesa”, yana mai cewa ya taka muhimmiyar rawa wajen sauya Qatar zuwa ɗaya daga cikin ƙasashen da suka fi tasiri a duniya. Modi ya kuma yaba da irin gudummawar marigayin wajen ƙarfafa dangantaka tsakanin Indiya da Qatar, tare da miƙa ta’aziyyarsa ga iyalan sarauta da al’ummar Qatar.
Shugabanni daga ƙasashen yankin Gulf da sauran sassan duniya su ma sun aike da saƙonnin ta’aziyya, suna yabawa da rawar da Sheikh Hamad ya taka wajen bunƙasa tattalin arzikin Qatar, inganta haɗin gwiwar ƙasa da ƙasa, da kuma ƙarfafa diflomasiyyar yankin. Da dama sun bayyana cewa shi ne ya taimaka wajen mayar da Qatar ɗaya daga cikin manyan masu fitar da iskar gas mai ruwa (LNG) a duniya.
A cikin Qatar, jama'a da hukumomi sun ci gaba da bayyana alhini tare da tuna Sheikh Hamad a matsayin “Uban Ƙasa”, wanda ya aza tubalin ci gaban Qatar ta zamani. Mutane da dama sun yabawa irin gudummawar da ya bayar wajen bunƙasa ilimi, gine-ginen more rayuwa, da kuma ɗaga martabar Qatar a idon duniya.