Isra’ila ta miƙa ƙarin nauyin gudanar da mulki a Yammacin Gabar Kogin Jordan da aka mamaye ga jami’an tsaron farar hula.
Matakin na nufin ƙara bai wa jami’an farar hula na Isra’ila damar gudanar da harkokin yankin, yayin da ake rage wasu daga cikin rawar da sojoji ke takawa wajen gudanar da al’amuran yau da kullum.
Masu sukar matakin sun ce wannan sauyi na iya zama wani ɓangare na shirin ƙara mamaye ko haɗa wasu sassan Yammacin Gabar Kogin Jordan cikin Isra’ila, tare da ƙara rage ikon Falasɗinawa a yankin.
Masu fafutukar Falasɗinawa da ƙungiyoyin kare haƙƙin ɗan Adam sun nuna damuwa cewa irin wannan mataki na iya ƙara faɗaɗa matsugunan Yahudawa da kuma ƙara tsananta takaddamar da ta shafi mallakar ƙasa.
Isra’ila kuwa ta dade tana cewa matakan tsaro da gudanar da mulki a yankin suna da alaƙa da kare tsaron ƙasarta da mazaunanta. Sai dai batun makomar Yammacin Gabar Kogin Jordan na ci gaba da kasancewa ɗaya daga cikin manyan batutuwan da ke hana samun dawwamammen zaman lafiya tsakanin Isra’ila da Falasɗinawa.