‘Yan sandan Birtaniya sun gurfanar da wani jami’in Rundunar Sojin Ruwa ta ƙasar, Royal Navy, bisa zargin yin aiki da wata ƙasa da kuma mallakar bayanan sirri da ake zargin zai iya cutar da tsaron ƙasar.
An gurfanar da Teddy Young, mai shekaru 24, bisa wasu tuhume-tuhume guda biyu da suka shafi dokar tsaron ƙasa ta Birtaniya. An kama shi ne a gidansa da ke Bedfordshire ranar Talata, 6 ga Oktoba, sannan aka kai shi London domin ci gaba da bincike.
A cewar hukumomi, ana zargin Young da yin wasu ayyuka tsakanin 26 ga Nuwamba, 2024, zuwa 21 ga Mayu, 2025, domin shirya fallasa wasu bayanan da aka ware a matsayin bayanan da ke da kariya. Ana kuma zarginsa da karɓa, kwafa, yin rikodi ko adana irin waɗannan bayanai da niyyar amfanar wata ƙasar waje.
Hukumomin Birtaniya sun ce ana zargin Young ya san, ko kuma yana da dalilin sanin, cewa ayyukan nasa na iya yin illa ga tsaro ko muradun ƙasar Birtaniya.
Ana sa ran Young zai bayyana a gaban Kotun Majistare ta Westminster da ke London a ranar Alhamis, 8 ga Oktoba, domin fara sauraron shari’ar.
Kwamanda Helen Flanagan, shugabar sashen yaƙi da ta’addanci na ‘yan sandan London, ta ce zarge-zargen da ake yi wa Young suna da matuƙar muhimmanci. Ta bayyana cewa masu bincike sun yi aiki tare da Ma’aikatar Tsaron Birtaniya domin tabbatar da cewa an ɗauki matakan da suka dace don rage duk wata barazana ga tsaron ƙasar.
‘Yan sandan sun kuma bayyana cewa kama Young da tuhume-tuhumen da ake yi masa ba su da alaƙa da wani bincike daban da ake gudanarwa kan wani lamari da ya faru kwanan nan a sansanin sojin sama na RAF Fairford. Hukumomi sun yi kira ga jama’a da su guji yin hasashe yayin da shari’ar ke ci gaba.
Young na hannun ‘yan sanda yayin da ake jiran gurfanar da shi a gaban kotu.