Kamfanin Dangote Petroleum Refinery and Petrochemicals ya kammala wani babban shirin tara jari na dala biliyan 2.5 ta hanyar karɓar jarin masu zaman kansu (Private Equity Placement), bayan da buƙatar masu zuba jari ta zarce adadin da aka fara nema har sau 3.7.
A cikin wata sanarwa da kamfanin ya fitar ranar Alhamis, ya bayyana cewa an samu nasarar fitar da sabbin hannayen jari da darajarsu ta kai kusan dala biliyan 2.5, lamarin da ya zama mafi girman irin wannan ciniki da aka bayyana a bainar jama'a a nahiyar Afirka ta fuskar darajar kuɗi.
Kamfanin ya ce wannan shi ne karo na farko da ya tara jarin masu zuba jari daga wajen tsofaffin masu hannun jarinsa, yana mai bayyana hakan a matsayin wani muhimmin mataki wajen aiwatar da dabarunsa na samar da kuɗaɗen ci gaba na dogon lokaci tare da bunƙasa kasuwannin jari na Afirka.
Dangote ya ce za a yi amfani da kuɗaɗen da aka samu wajen faɗaɗa matatar mai da masana'antar sinadarai ta kamfanin, ƙarfafa tsarin kuɗaɗensa da kuma samar da isasshen ƙarfin kuɗi domin aiwatar da sabbin shirye-shiryen bunƙasa kamfanin nan gaba.
Sanarwar ta bayyana cewa masu zuba jari daga ƙasashen duniya da na Afirka, cibiyoyin kuɗi, hukumomin raya tattalin arziki da sauran abokan hulɗa na dabaru sun nuna gagarumar sha'awa wajen saka hannun jari a wannan shiri.
Daga cikin manyan masu zuba jarin akwai Africa Finance Corporation da India Infra Buildco, wani kamfanin zuba jari da African Export-Import Bank (Afreximbank) ya taimaka wajen samarwa, tare da wasu cibiyoyi da daidaikun masu zuba jari.
Kamfanin ya ce irin wannan gagarumar halarta ta nuna cikakken amincewar kasuwa da dabarun ci gaban matatar Dangote na dogon lokaci.
Shugaban Dangote Industries Limited kuma Shugaban Hukumar Daraktocin Dangote Petroleum Refinery and Petrochemicals, Alhaji Aliko Dangote, ya ce wannan mataki zai ƙara ƙarfafa tsarin mallakar kamfanin tare da samar masa da ƙarin kuɗaɗen da za su taimaka wajen faɗaɗa ayyukansa.
Ya bayyana cewa tara wannan jari wata muhimmiyar dabara ce ta faɗaɗa tushen masu hannun jari na kamfanin tare da haɗa kuɗaɗen da ake samu daga ayyukan kamfanin da sauran hanyoyin samun kuɗi domin ci gaba da shirye-shiryen faɗaɗa matatar.
Dangote ya ƙara da cewa hakan na nuna ƙudurin kamfanin na haɓaka ƙarfin tace mai da masana'antar sinadarai a nahiyar Afirka domin rage dogaro da shigo da tataccen mai daga ƙasashen waje tare da ƙarfafa tsaron makamashi a nahiyar.
Shi ma Manajan Darakta kuma Babban Jami'in Gudanarwa na kamfanin, David Bird, ya ce yawan masu neman saka hannun jari ya nuna irin amincewar da masu zuba jari ke da ita ga yadda kamfanin ke gudanar da ayyukansa da kuma jagorancinsa.
A cewarsa, wannan gagarumar buƙata ta tabbatar da ƙwarewar kamfanin wajen gudanar da ayyuka, iya aiwatar da manyan tsare-tsare da kuma amincewar masu zuba jari ga shugabancin kamfanin.
Kamfanin ya ce nasarar wannan shirin za ta ba shi damar ci gaba da aiwatar da dabarunsa na bunƙasa kasuwanci na dogon lokaci tare da ƙarfafa samar da makamashi a Afirka ta hanyar faɗaɗa ƙarfin tace mai da samar da sinadarai.
Matatar Dangote da ke Legas na da ƙarfin tace gangar danyen mai 650,000 a kowace rana, kuma tana daga cikin manyan matatun mai mafi girma masu layin tace guda ɗaya a duniya.