A yayin bikin cika shekaru 25 da hare-haren ta’addancin ranar 11 ga Satumba, 2001, reshen yada labarai na kungiyar Al-Qaeda, As-Sahab, ya fitar da wani bidiyon farfaganda mai tsawon mintuna 50, wanda ya kunshi wasu hotunan da ba a taba gani ba na Hamza bin Laden, ɗan wanda ya kafa kungiyar, Osama bin Laden.
Bidiyon ya ja hankalin hukumomin leken asiri, musamman saboda gwamnatin Amurka ta sanar a shekarar 2019 cewa an kashe Hamza bin Laden a wani samame na yaki da ta’addanci a yankin kan iyakar Afghanistan da Pakistan.
Sai dai Al-Qaeda ba ta taba tabbatar da mutuwarsa a hukumance ba, kuma ba ta taba fitar da sanarwar makoki ta musamman domin tunawa da shi ba.
Bidiyon mai taken “A Quarter Century of the 11 September Raids” (Kwata Karni da Hare-haren 11 ga Satumba) ya yi bikin cika shekaru 25 da hare-haren da aka kai wa Cibiyar Cinikayyar Duniya da ke New York da Pentagon da ke Virginia.
Hamza bin Laden ya bayyana a sabon bidiyon
A cikin bidiyon, an nuna Hamza bin Laden zaune a gaban wata katangar laka da ta tsage, sanye da farin rawani, yayin da aka ajiye wata bindigar soja a gefensa.
Yanayin da hoton ya nuna ya yi matuƙar kama da wasu bidiyoyin da mahaifinsa, Osama bin Laden, ya fitar a farkon shekarun yakin Al-Qaeda.
Masu sharhi kan harkokin tsaro sun ce irin wannan hoto na iya kasancewa an tsara shi ne domin tunatar da mutane tarihin kungiyar tare da ƙarfafa alaƙar dangin Bin Laden da Al-Qaeda.
Bidiyon ya kuma ƙunshi wasu hotunan da ba a taba fitar da su ba na tsohon shugaban Al-Qaeda, Ayman al-Zawahiri, da kuma wasu tsoffin hotuna da suka shafi ayyukan kungiyar.
Dalilin da ya sa hotunan ke da muhimmanci
Bayyanar Hamza bin Laden a sabon bidiyon na iya ƙara tayar da tambayoyi game da rahotannin mutuwarsa.
Tsawon shekaru, an kallafa wa Hamza a matsayin wanda zai iya maye gurbin mahaifinsa. Jami’an gwamnatin Amurka ma sun bayyana shi a matsayin wani muhimmin jigo a cikin Al-Qaeda.
Bayyanarsa a wannan sabon bidiyo na iya zama wata hanya da kungiyar ke amfani da ita wajen sake farfaɗo da sunan dangin Bin Laden da dangantakarsa da tsohon jagorancin kungiyar.
Amurka ta sanar da mutuwarsa a 2019
Gwamnatin Amurka ta sanar a shekarar 2019 cewa an kashe Hamza bin Laden a wani samame na yaki da ta’addanci, duk da cewa jami’an Amurka ba su bayyana cikakkun bayanai kan yadda aka gudanar da samamen ba a lokacin.
Rahoton mutuwarsa ya zo ne shekaru bayan da dakarun Amurka suka kashe mahaifinsa, Osama bin Laden, a Abbottabad da ke Pakistan a shekarar 2011.
Sai dai sabanin Osama bin Laden da Ayman al-Zawahiri, Al-Qaeda ba ta taba sanar da mutuwar Hamza a hukumance ko fitar da sanarwar makoki ta musamman a kansa ba.
Fitar da sabon bidiyon ta zo ne a daidai lokacin da ake cika shekaru 25 da hare-haren 11 ga Satumba, wadanda suka yi sanadin mutuwar kusan mutane 3,000 kuma suka kasance daya daga cikin manyan abubuwan da suka danganta kungiyar Al-Qaeda da ta’addanci a duniya.
A yanzu haka, hukumomin leken asiri da masu yaki da ta’addanci na nazarin bidiyon domin gano tushensa, lokacin da aka dauki hotunan da ke cikinsa da kuma dalilin da ya sa kungiyar ta fitar da shi a wannan lokaci.
Jaridar Firstpost ta ce ba ta iya tabbatar da sahihancin bidiyon da kanta ba.