Kwamishiniyar Zaɓe ta Hukumar Zaɓe Mai Zaman Kanta ta Ƙasa (INEC) a Jihar Anambra, Dakta Queen Elizabeth Agwu, ta bayyana a ranar Juma’a cewa hukumar ta shirya tsaf domin gudanar da babban zaɓen shekarar 2027 a jihar cikin kwanciyar hankali, sahihanci da adalci.
Agwu ta bayyana hakan ne a wani taron masu ruwa da tsaki da ya gudana a Awka, babban birnin jihar, wanda ya samu halartar wakilan jam’iyyun siyasa da za su shiga zaɓen, hukumomin tsaro, ƙungiyoyin fararen hula da kafafen yaɗa labarai.
Ta ce akwai buƙatar gaggawa ga mutanen da suka yi rajistar zaɓe tsakanin watan Janairu da Yuli a lokacin rajistar masu zaɓe da ake ci gaba da gudanarwa, da su je hedikwatar hukumar ko cibiyoyin da aka ware domin duba sunayensu a cikin kundin rajistar da aka baje, tare da karɓar katin zaɓensu na dindindin (PVC).
Ta bayyana cewa an fara wannan aikin ne a ranar Juma’a, kuma za a kammala shi a ranar 15 ga wannan wata.
Kwamishiniyar ta buƙaci jam’iyyun siyasa da ’yan takararsu su shirya yadda ya kamata, su gudanar da ayyukansu cikin ladabi da sanin ya kamata, tare da mayar da hankali wajen yaƙin neman zaɓe bisa nasarorin da suka samu da kuma alkawuran da za su iya cikawa idan aka zaɓe su, maimakon yin alkawuran da ba su da tushe.
Haka kuma, ta bayyana cewa hukumar na sa ido sosai kan kuɗaɗen da jam’iyyun siyasa ke kashewa wajen yaƙin neman zaɓe, inda ta buƙace su da su gudanar da ayyukansu cikin tsari da ɗaukar nauyi.
Agwu ta ce: “Mu a INEC mun shirya da kayayyakin aiki da duk abin da ake buƙata. Babu wata matsala da za ta kawo tsaiko a wannan zaɓen. Ba za mu fifita kowa ba. Wanda ya ci nasara shi ne za a ayyana a matsayin wanda ya yi nasara. Muna da isassun jami’an tsaro, amma idan kana shirin haddasa rikici, ka sake tunani.”
Ta ƙara da cewa: “Kwanaki 97 ne suka rage kafin gudanar da zaɓen. Ku gaya wa mutanenmu su je su yi rajistar zaɓe. Ku fito da manufofin jam’iyyunku fili, ku gaya wa mutane abin da kuke son yi musu. Al’ummar Jihar Anambra suna son sanin abin da kuka yi a baya da kuma abin da kuke shirin yi musu nan gaba. Kada ku yi tunanin kawo cikas ga zaɓen, domin hakan ba zai yiwu ba.”
Kwamishiniyar ta kuma bayyana cewa hukumar ta horas da ma’aikatanta a matakai daban-daban domin dacewa da sauye-sauyen fasaha da ake samu a fannin gudanar da zaɓe.
Ta ce hukumar ta sayo na’urorin tantance masu zaɓe da tabbatar da sahihancin ƙuri’a (BVAS) kimanin guda 5,720, tare da gudanar da binciken kayayyakin more rayuwa domin tabbatar da gudanar da zaɓen 2027 cikin nasara.
Agwu ta gargaɗi jam’iyyun siyasa da ’yan takararsu cewa za ta gurfanar da duk wanda aka samu yana ba ma’aikatan INEC kuɗi da nufin rinjayar tsarin zaɓe.
Ta ce: “Ku je ku yi aikinku yadda ya kamata, amma idan kuna neman wata hanya ta gajeren zango domin samun nasara, to babu irin wannan hanya. Ba zai yiwu ba, kuma ba daidai ba ne a lalata makomar wani.”
Dangane da karɓar katin zaɓe na dindindin (PVC), Agwu ta bayyana cewa babu wani kuɗi da ake buƙatar biya, inda ta ƙara da cewa za a kula da duk masu zuwa karɓar katunan bisa ƙa’idojin da aka shimfiɗa.
Ta kuma shawarci mutanen da ke son yin rajistar zaɓe kafin gudanar da babban zaɓen da su yi hakan, tana mai cewa har yanzu shafin rajistar INEC yana aiki. Haka kuma, ta bayyana cewa za a fara horas da ma’aikatan wucin-gadi da za su taimaka wajen gudanar da zaɓen ta yanar gizo a mako mai zuwa.
Kwamishiniyar ta sake tabbatar wa masu ruwa da tsaki cewa ba za a lamunci maguɗin zaɓe ba, tana mai cewa zaɓen 2027 zai zama zaɓe na shida da aka gudanar a Jihar Anambra a ƙarƙashin kulawarta ba tare da wata matsala ba.
Dangane da sayen ƙuri’u, Agwu ta nuna yatsa ga jam’iyyun siyasa, inda ta jaddada cewa dole ne su gyara lamuransu kuma su gudanar da ayyukansu cikin gaskiya da sanin ya kamata domin tabbatar da zaɓe sahihi kuma mai gaskiya.
Ta ce: “Ku fito da yawa ranar zaɓe domin kada kuri’unku ga ’yan takarar da kuka zaɓa, amma kada ku fita da niyyar tayar da hankali, domin jami’an tsaro suna ko’ina. INEC tana nan domin tabbatar da cewa kowa ya samu damar yin takara a ƙarƙashin yanayi na adalci.”
Agwu ta kuma bayyana cewa hukumar ta fara ƙaura da wasu ofisoshinta da ke cikin sakataroriyar ƙananan hukumomi a Jihar Anambra da sauran sassan ƙasar zuwa wasu wurare. Ta ce an ɗauki wannan matakin ne domin rage yiwuwar maguɗin zaɓe.
Ta ƙara da cewa: “Mun bayar da kwangilolin gina wuraren ajiye kayayyakin zaɓe da wasu gine-gine. Haka kuma, mun sayo isassun motoci da sauran kayayyakin da ake buƙata domin gudanar da zaɓen cikin nasara.”
Kwamishiniyar ta shawarci shugabannin ƙananan hukumomi da su gudanar da wayar da kan jama’a a yankunansu domin ƙarfafa musu gwiwar fita da yawa ranar zaɓe, su kaɗa ƙuri’unsu ga ’yan takarar da suka zaɓa.
Ta ƙara da cewa: “Zaɓe da dukkan ayyukan da suka shafi zaɓe ba abin wasa ba ne. Babban aiki ne da ya kamata a ɗauka da muhimmanci.”